ސަރުކާރުން އަންނަ އަހަރަށް ލަފާކުރާ ބަޖެޓް، ބުރާސްފަތިދުވަހު ރައްޔިތުންގެ މަޖިލީހަށް ހުށަހެޅުމަށް ނިންމައިފިއެވެ.
މިއަދު އޮތް ރައްޔިތުން މަޖިީހުގެ މާލިއްޔަތު ކޮމިޓީގެ ބައްދަލުވުމެއްގައި ވާހަކަދައްކަވަމުން މަޖިލީހުގެ ނައިބުރައީސް އަހުމަދު ނާޒިމް ވިދާޅުވެފައިވަނީ އަންނަ ބުރާސްފަތި ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާއަށް ކުރިއަސް އޮތް އަހަރުގެ ބަޖެޓް ހުށަހެޅުމަށް މަޖިލީހުގެ ރައީސް އަބްދުއްރަހީމް އަބްދުﷲ ނިންމަވާފައިވާ ކަމަށެވެ. އެގޮތުން ކުރިއަށް އޮތް ދެ ދުވަހެއްގެ ތެރޭގައި ބަޖެޓް ހިސާބުތައް ލިބޭވަރުވާނޭކަމަށް އޭނާ ވިދާޅުވިއެވެ.
އަންނަ އަހަރުގެ ބަޖެޓް ހުށަހެޅުމަށް ސަރުކާރުން ތައްޔާރުވަމުން އަންނައިރު، ސަރުކާރުން ވަނީ މިދިޔަ ބުރާސްފަތި ދުވަހު ސަޕްލިމަންޓަރީ ބަޖެޓެއް މަޖިލީހަށް ހުށަހަޅާފައެވެ. ސަރުކާރުން 5.1 ބިލިއަން ރުފިޔާގެ ސަޕްލިމަންޓަރީ ބަޖެޓެއް ހުށަހެޅިއިރު، ބަޖެޓް މިހާރު ވަނީ ކޮމިޓީއަށް ފޮނުވާފައެވެ.
ސަރުކާރުން ސަޕްލިމެންޓަރީ ބަޖެޓެއް ހުށަހެޅިއިރު، މިއަހަރަށް ކަނޑައެޅި ބަޖެޓުން، މިދިޔަ މަހުގެ ނިޔަލަށް ހޭދަކުރެވިފައިވަނީ، ބަޖެޓުގެ 74 އިންސައްތަކަމަށް ފިނޭންސް މިނިސްޓްރީން ބުނެއެވެ.
ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ބަޖެޓަށް އާމްދަނީގެ ގޮތުގައި ލިބޭނޭކަމަށް ލަފާކުރީ 33.5 ބިލިއަން ރުފިޔާއެވެ. ޑެފިސިޓް ހުންނާނޭކަމަށް ލަފާކޮށްފައިވަނީ 16.3 ބިލިއަން ރުފިޔާގައެވެ.
Advertisement
This content is created and paid for by advertisers and does not involve Voice Journalists
