ބޭންކް އޮފް މޯލްޑިވްސްއިން ނަގާފައިވާ ލޯނަކަށް ފައިސާ ނުދައްކައިގެން، ރައްޔިތުން މަޖިލީހުގެ ކުރީގެ ނައިބުރައީސް ރީކޯ މޫސާ މަނިކުގެ ހެވޯ ލޯޑް މޯލްޑިވްސްއަށް ލ.އަތޮޅުން ދީފައިވާ 3 ރަށް ވިއްކާލުމަށް ބޭންކުން އިއުލާނުކޮށްފިއެވެ.

ބީއެމްއެލުން ވިއްކާލުމަށް އިއުލާނުކޮށްފައިވަނީ، ލ އަތޮޅު ފަރެސް، ކުޑަ ފަރެސް އަދި ބޮޑުހުރާއެވެ.

މީގެ ތެރެއިން ފަރެސް އަދި ކުޑަ ފަރެސް ޓޫރިޒަމަށް ބޭނުންކުރާއިރު، ބޮޑުހުރާ ބޭނުންކުރަނީ ދަނޑުވެރިކަމަށެވެ. 

ބީއެމްއެލުން ކުރި އިއުލާނުގައިވަނީ އެ ރަށްތައް ވިއްކާލުމަށް ދެ އޮޕްޝަނެއް ދީފައެވެ. 

ފުރަތަމަ އޮޕްޝަނުގައި ވާގޮތުން ތިންރަށް އެއްކޮށް ގަތުމަށް އެންމެ ކުޑަކޮށް ހުށަހެޅޭނެ އަގެއްގެ ގޮތުގައި ކަނޑައަޅާފައިވަނީ 23.3 މިލިއަން ޑޮލަރެވެ.

ފަރެސް އައިލެންޑާއި، ކުޑަފަރެސް ވަކިވަކިން ގަތުމަށް ހުށަހެޅޭއިރު، ދެ ރަށަށް ވަކިން އެންމެ ކުޑަ އަގެއްގެ ގޮތުގައި ހުށަހަޅަންޖެހެނީ 23.2 މިލިއަން ޑޮލަރެވެ. މީގެ އިތުރުން ބޮޑުހުރާ ވަކިން ގަންނަ ނަމަ އެންމެ ކުޑަކޮށް ހުށަހެޅެނީ 23.2 މިލިއަން ޑޮލަރެވެ.

ސިވިލްކޯޓުގެ ހުކުމަށް ބަލާއިރު، ހެވީލޯޑުން ލޯނުގެ ގޮތުގައި ބީއެމްއެލުން ނަގާފައިވަނީ، 11 މިލިއަން ޑޮލަރެވެ. 

ބީއެމްއެލުން ބުނީ، އެ ރަށްތައް ގަތުމަށް ޝައުގުވެރިކަން ހުރި ފަރާތްތަކުން އަންނަ ނޮވެމްބަރުމަހުގެ 28 ވަނަ ދުވަހުގެ 12 ޖެހުމުގެ ކުރިން ޕްރޮޕޯސަލް ހުށަހަޅަން ޖެހޭނޭ ކަމަށެވެ.

ރީކޯ މޫސަގެ މަސްލަހަތު އޮންނަ ހެވީލޯޑަށް ލ.އަތޮޅުން ތިން ރަށް ސަރުކާރުން، ދީފައިވަނީ ތިލަފުށި ބިންހިއްކުމުގެ މަޝްރޫޢުން އެކުންފުންޏަށް ލިބުނު ގެއްލުމުގެ ބަދަލެއްގެ ގޮތުންނެވެ.