ރާއްޖެއައިސް ފުޅާދާއިރާއެއްގައި ހަށިވިއްކަން އުޅުނު ބަޔަކު އަނެއްކާވެސް އަތުލައިގަަަނެ، އެއްބަޔަކު ޑީޕޯޓްކޮށްފިއެވެ.

އިމިގްރޭޝަނުން ބުނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން މިހިނގާ އޮކްޓޫބަރު މަހުގެ ތެރޭގައި ހާއްސަ އިންސްޕެކްޝަން ތަކެއް ކުރިއަށް ގެންގޮސްފައިވާ ކަމަށެވެ.

އެގޮތުން ކުރިއަށްގެންދިޔަ އޮޕަރޭޝަނުގައި މިފަދަ 05 މައްސަލައަކާއި ގުޅިގެން ބިދޭސީ 7 އަންހެނަކު އަދި އެޖެންޓުންގެ ގޮތުގައި މަސައްކަތް ކުރަމުންދިއަ ބިދޭސީ 2 ފިރިހެނަކު އިމިގްރޭޝަންގެ ބެލުމުގެ ދަށަށް ވަނީ ގެންގޮސްފައެވެ.

Advertisement

އިމިގްރޭޝަނުން ބުނީ، މި މައްސަލަތައް ތަހުޤީޤު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން 05 އަންހެނަކު އަދި 01 ފިރިހެނަކު މިހާރު ވަނީ ޑީޕޯޓުކޮށްފައިވާކަމަށެވެ. އަދި އަނެއް 3 ބިދޭސީން ޑީޕޯޓުކުރުމުގެ މަސައްކަތް މިހާރުދަނީ ކުރަމުން ކަމަށް އިމިގްރޭޝަނުން ބުންޏެވެ.

ގަވައިދާ ހިލާފަށް އުޅެމުންދާ ބިދޭސީން ހޯދުމުގައި އިމިގްރޭޝަނުން ކުރިއަށްގެންދާ އޮޕަރޭޝަނުގައި އެންމެ ގިނައިން އަތުލައިގަނެވޭ މީހުންގެ ތެރޭގައި ހަށިވިއްކުމުގެ ވިޔަފާރީގައި ހަރަކާތްތެރިވާ ބިދޭސީން ހިމެނޭކަން ފާހަގަކޮށްލެވެއެވެ.

ހަށިވިއްކާ ތަންތަނާ ބެހޭގޮތުން މީގެ ކުރިން ދާހިލީ ވަޒީރު އިހްސާނު ވިދާޅުވެފައިވަނީ މާލޭގައި ހިންގާ ގިނަ ސެލޫންތަކާއި ސްޕާތަކުގައި ހަށިވިއްކަމުންދާ ކަމުގެ މައުލޫމާތު މިނިސްޓްރީއަށް ލިބިފައިވާ ކަމަށާއި، އެގޮތުން އެފަދަ 111 ތަނެއް ފާހަގަކުރެވިފައިވާކަމަށެވެ.

ވަޒީރު ވިދާޅުވެފައިވަނީ ހަށިވިއްކުމުގެ މަސައްކަތް ކުރަމުންދަނީ ރާއްޖެއިން ބޭރުން ގެންނަ އަންހެން މަސައްކަތްތެރިންނާއި ޓޫރިސްޓު ވިސާގައި މީހުން އެތެރެކޮށްގެން ކަމަށެވެ.

ރާއްޖެ ގެންނަ ބިދޭސީންލައްވާ މަސާޖު ޕާލަރު ތަކުގައި ހަށިވިއްކުމުގެ ވިޔަފާރި ކުރުވާ ދިވެހިންނާ ދެކޮޅަށް ހިޔުމަށް ޓްރެފިކިންގ ގެ ތަހުގީގެއް ކުރުމާއެކު، އެމީހުން ޖޫރިމަނާކޮށް ޕާސްޕޯޓު ހިފަހައްޓާނެ ކަމަށް ދާޚިލީ ސަލާމަތާ ބެހޭ ވުޒާރާގެ ވަޒީރު ޢަލީ އިހުސާން ވަނީ މިއަހަރުގެ އޮގަސްޓްމަހު ވިދާޅުވެފައެވެ.