އެކުވެރި އަރަބި އިމާރާތަށް ނިސްބަތްވާ، އެއާ އަރަބިއާގެ ދަތުރުތައް ރާއްޖެއަށް ފަށައިފިއެވެ.

ވެލާނާ އިންޓަރނޭޝަނަލް އެއާޕޯޓަށް އެއާ އަރަބިއާގެ ދަތުރުތައް ފަށާފައިވާއިރު، މިއަދު އައި އެ އެއާލައިނުގެ ފްލައިޓަށް ވަނީ ވޯޓަރ ސެލިއުޓެއް ދީފައެވެ.

މި ފްލައިޓަށް މަރުހަބާ ކިޔާފައިވަނީ، އެމްއޭސީއެލް އަދި އެމްއެމްޕީއާރުސީގެ އިސް ވެރިންނެވެ.

އެއާ އަރަބިއާގެ ފްލައިޓަށް މަރުހަބާ ކިޔުމަށް ބޭއްވި ހަފްލާގެ ތެރެއިން.. ފޮޓޯ/އެމްއޭސީއެލް

އެއާ އަރަބިއާ އަކީ ޔޫއޭއީގެ ބަޖެޓް އެއާލައިނެކެވެ. އެއާ އަރަބިއާގެ ދަތުރުތައް ރާއްޖެއަށް ފަށާނޭކަން އެ އެއާލައިނުން ވަނީ މިއަހަރުގެ ޖުލައިމަހު އާއްމުކޮށްފައެވެ. އެއާ ރަބިއާއިން ވީއައިއޭއަށް ދުވާލަކު ފްލއިޓެއް ބޭއްވުމަށް ވަނީ ތާވަލްކޮށްފައެވެ. މި ދަތުރުތަކުގައި ބޭނުންކުރާނީ އެއަރބަސް ކުންފުނީގެ އޭ-320 މަރުކާގެ ބޯޓުތައްކަމަށްވެސް އެއާ އަރަބިއާއިން ބުނެއެވެ.

ޔޫއޭއީގެ އެއާ އަރަބިއާގެ ދަތުރުތައް ފެށުމާ ގުޅިގެން މޯލްޑިވްސް މާކެޓިން ޕީއާރު ކޯޕަރޭޝަން (އެމްއެމްޕީއާރުސީ) ގެ މެނޭޖިންގ ޑިރެކްޓަރު ވިދާޅުވީ، މި ދަތުރުތަކުގެ ސަބަބުން މެދުއިރުމަތީގެ ޤައުމުތަކުން ރާއްޖެ އަންނަ ފަތުރުވެރިންގެ އަދަދު އިތުރުވާނޭ ކަމަށެވެ. އަދި މިއީ އެ ސަރަހައްދުގައި މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރުކުރުމަށް މަގުފަހިވެގެންދާނޭ ކަމެއްކަމަށް ޝިއުރީ ފާހަގަކުރެއްވިއެވެ.

އެއާ އަރަބިއާގެ ފްލައިޓަށް މަރުހަބާ ކިޔުމަށް ބޭއްވި ހަފްލާގެ ތެރެއިން.. ފޮޓޯ/އެމްއޭސީއެލް 

ޓޫރިޒަމް މިނިސްޓްރީން ނެރެފައިވާ އެންމެފަހުގެ ތަފާސްހިސާބުތަކަށް ބަލާއިރު، އޮގަސްޓްމަހުގެ ނިޔަލަށް މެދުއިރުމަތީގެ ގައުމުތަކުން ރާއްޖެއަށް 57,434 ފަތުރުވެރިން ވަނީ ޒިޔާރަތްކޮށްފައެވެ. މީގެ ތެރެއިން ޔޫއޭއީން ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ 11,406 ގައެވެ.