ރާއްޖެއަށް ތެލުގެ ބާވަތްތައް އެތެރެކުރަމުން އަންނަ ހޯކްސް ކުންފުނީގެ ބޯޓަކުން ވަގަށް އެތެރެކުރި ސިނގިރޭޓްތަކެއް ކަސްޓަމްސްއިން ހިފަހައްޓައިފިއެވެ.

ވޮއިސްއަށް މައުލޫމާތު ލިބިފައިވާ ގޮތުގައި ވަގަށް އެތެރެކުރި ސިނގިރޭޓްތައް ކަސްޓަމްސްއިން ހިފަހައްޓާފައިވަނީ ހުކުރުދުވަހުގެ ރެއެވެ. މައުލޫމާތު ލިބިފައިވާ ގޮތުގައި ކަސްޓަމްސްއިން ހިފެހެއްޓި ސިނގިރޭޓް ކާޓޫންތަކުގެ އަދަދު 2،000 އަައެވެ.

ވަގަށް ސިނގިރޭޓް ކާޓޫންތަކެއް އެތެރެކުރަނިކޮށް ހިފަހައްޓާފައިމިވަނީ، ދުންފަތް ބޭނުންކޮށްގެން ތައްޔާރުކޮށްފައި ހުންނަ ސިނގިރޭޓާއި ބިޑި ފަދަ ތަކެތިން އިމްޕޯޓް ޑިއުޓީ ބޮޑުކުރުމަށް ތައްޔާރުވަމުން ދަނިކޮށެވެ. ސިނގިރޭޓުން ނަގާ ޑިއުޓީ އަންނަ މަހުން ފެށިގެން 3 ރުފިޔާއިން 8 ރުފިޔާ ބޮޑުކުރުމަށް ނިންމާފައެވެ. އަލަށް ބޮޑުކުރާ ޓެކްސް ރޭޓުން ބަލާނަމަ އަތުލައިގަތް ސިނގިރޭޓްގެ އަގު 3.2 މިލިއަން ރުފިޔާއަށް އަރައެވެ.

މިކަމާ ގުޅިގެން ދާހިލީ ވަޒީރު އަލީ އިހުސާންވެސް ވަނީ މިފަދަ މައްސަލައެއް ހިނގައިގެން އުޅޭކަން ކަށަވަރުކޮށްދެއްވާފައެވެ. މި މައްސަލަ ބަލަމުންދާތީވެ، ކަސްޓަމްސްގެ ބެލުމުގެ ދަށަށް ގެނެވުނީ ކިހާ އަދަދެއްގެ ސިނގިރޭޓެއްކަން އަދި ކަށަވަރުކޮށްދެއްވާފައެއް ނުވެއެވެ.

މިކަމާ ގުޅިގެން ހޯކްސް ކުންފުނިން ވަނީ އެކުންފުނީގެ ބޯޓަކުން ސިނގިރޭޓްތަކެއް އެތެރެކޮށްގެން ކަމާބެހޭ އިދާރާތަކުން އެކަން ބަލަމުން އަންނަކަން ފާަހަގަކޮށްފައެވެ. ހޯކްސްއިން ބުނީ މިއީ އެކުންފުންޏަށް އެނގިގެން ވީކަމެއް ނޫންކަމަށާއި، މިކަން ބަލާ ތަހުގީގްކުރުމަށް ދައުލަތުގެ ކަމާބެހޭ ފަރާތްތަކަށް އެއްބާރުލުން ދެމުންދާކަމަށެވެ.

ދުންފަތް ބޭނުންކޮށްގެން ތައްޔާރުކޮށްފައި ހުންނަ އެއްޗެހިން ނަގާ ފީތައް ބޮޑުކުރުމަށް ސަރުކާރުން ނިންމާފައިވާއިރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ރާއްޖެއަށް ވޭޕް އެތެރެކުރުމާއި ވިއްކުންވެސް މަނާކުރުމަށް ނިންމަވާފައެވެ. 

ވޭޕް މަނާކުރުމަށް ރައީސުލްޖުމްހޫރިއްޔާ ނިންމެވީ ވޭޕުން ލިބޭ ގެއްލުންތައް ނުހަނު ބޮޑުކަމަށާއި، އެ މަނާކުރަންޖެހޭކަމަށް ރާއްޖޭގެ ޑޮކްޓަރުންގެ ޤައުމީ ޖަމިއްޔާއިން ގޮވާލާފައި ވަނިކޮށެވެ. މީގެ އިތުރުން ގިނަ އަދަދެއްގެ ބެލެނިވެރިންވެސް ވަނީ ވޭޕް މަނާކުރުމަށް ޕެޓިޝަނެއްވެސް ސަރުކާރުގެ ކަމާބެހޭ އިދާރާތަކަށް ހުށަހަޅާފައެވެ.

ވޭޕް މަނާކުރަން ނިންމުމާ ގުޅިގެން، ވޭޕް އެއްޗެހި ވިއްކާ ފިހާރަތައް ބަންދުކޮށް، ބައެއް ފަރާތްތަކުން ވަނީ މަގުމައްޗަށް ނިކުމެ އިހުތިޖާޖުވެސްކޮށްފައެވެ.