ސެމީ ކޮންޑަކްޓަރ އުފައްދާ ދުނިޔޭގެ އެންމެ ބޮޑު ކުންފުނި ޓައިވާން ސެމީކޮންޑަކްޓަރ މެނުފެކްޗަރިން ކޮމްޕެނީ (ޓީ.އެސް.އެމް.ސީ)ގެ ޗިޕެއް، ޗައިނާގެ ހުއާވޭ ކުންފުނީގެ އޭ.އައި ޕްރޮސެސަރއަކުން ފެނުނު މައްސަލައެއް ފެންމަތިވެއްޖެއެވެ.

އެމެރިކާއިން ޗައިނާއާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ތަބާވުމުގެ ގޮތުން ޓީ.އެސް.އެމް.ސީ ކުންފުނީގެ ޗިޕްތައް ހުއާވޭ ކުންފުންޏަށް ނުވިއްކައެވެ. މިމައްސަލައިގައި ޓައިވާނުން ޗިޕް ފޯރުކޮށްދޭ ޗައިނާގެ ކުންފުންޏެއް ކަމަށްވާ ސޮފްގޯ ކުންފުންޏަށް ޗިޕް ވިއްކުން ޓީ.އެސް.އެމް.ސީ އިން ވަނީ މެދުކަނޑާލާފައެވެ. އެހެންނަމަވެސް ސޮފްގޯ އިން ބުނީ ހުއާވޭ ކުންފުންޏަށް ޓައިވާނުގެ ޗިޕް ނުވިއްކާކަމަށާއި، އެޗިޕަކީ އެކުންފުނިން ދިޔަ އެއްޗެއް ނޫންކަން ސާބިތުކޮށްދޭނެ ރިޕޯޓެއް މިހާރު ޓީ.އެސް.އެމް.ސީ އަށް ހުށަހަޅާފައިވާނެ ކަމަށެވެ.

ހުއާވޭ ޕްރޮސެސަރއެއްގައި ޓީ.އެސް.އެމް.ސީ ކުންފުނީގެ ޗިޕެއް ހުރިކަން ފަޅާއަރާފައިވަނީ ޓެކްއިންސައިޓްސް ކިޔާ ޓެކްނޮލޮޖީގެ ދިރާސާކުރާ ކުންފުންޏަކުން ހުއާވޭ ކުންފުނީގެ އެޗިޕް ރޫޅާލައިގެން ބެލުމުންނެވެ. ޓީ.އެސް.އެމް.ސީގެ ޗިޕެއް ހުރިކަން އެނގުމާއެކު ޓެކްއިންސައިޓްސް އިން ވަނީ ޓީ.އެސް.އެމް.ސީ އަށް މިކަން އަންގާފައެވެ. އަދި އެކުންފުނިން ވަނީ އެމެރިކާގެ ވިޔަފާރިއާއި ބެހޭ ވުޒާރާއަށްވެސް އެހިސާބުން އެކަން އަންގާފައެވެ.

Advertisement

އެމެރިކާގެ ކޮމަރސް ޑިޕާޓްމަންޓުން ބުނީ އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކާ ޚިލާފުވެފައިވާކަމުގެ ރިޕޯޓްތަކެއް ލިބިފައިވާކަމަށެވެ. އެހެންނަމަވެސް އެކަމާ ގުޅިގެން ތަހުގީގެއް ހިންގާކަމެއް ނުވަތަ ނޫންކަމެއް އެމެރިކާއިން ހާމަކޮށްފައެއް ނުވެއެވެ.

މިމައްސަލައިގައި ހުއާވޭ ކުންފުނިންވެސް އަދި ޓީ.އެސް.އެމް.ސީ އިންވެސް މިހާތަނަށް ވަކި އެއްޗެއް ބުނެފައެއް ނުވެއެވެ.

ހުއާވޭ ކުންފުންޏާއި، ޗައިނާގެ އެހެން ޓެކްނޮލޮޖީ ކުންފުނިތަކުން އެހެން ގައުމުތަކުގެ ޓެކްނޮލޮޖީ ވަގަށް ނަގައިގެން ބޭނުންކުރާކަމަށާއި، ހުއްދަ ނެތި ބޭނުންކުރާކަމަށް އެމެރިކާއާއި ޔޫރަޕިއަން ޔޫނިއަން އިން ތަކުރާރުކޮށް ތުހުމަތުކުރެއެވެ. އަދި އެކުންފުނިތަކުގެ އުފެއްދުންތަކުގެ ބޭނުންކުރާ ފަރާތްތަކުގެ މައުލޫމާތު ޗައިނާ ސަރުކާރަށް ފޯރުކޮށްދޭކަމަށްވެސް ތުހުމަތުކުރެއެވެ. އެހެންނަމަވެސް ޗައިނާއިން އަންނަނީ އެކަން ދޮގުކުރަމުންނެވެ.