އިލެކްޝަންސް ކޮމިޝަން (އީސީ) އަދި އެންޓި ކޮރަޕްޝަން ކޮމިޝަން (އޭސީސީ) ގެ ރައީސާއި ނައިބު ރައީސް އައްޔަނުކުރުމުގެ ބާރު ރައީސުލްޖުމްހޫރިއްޔާއަށް ދިނުމަށް ހުށަހަޅާފައިވާ ގާނޫނީ އިސްލާހަކީ މިހާރުގެ ސަރުކާރުގެ ސިއްރު އެޖެންޑާގެ ބައެއް ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.
އީސީ އާއި އޭސީސީގެ ރައީސާއި ނައިބު ރައީސް، ރައީސް އައްޔަންކުރައްވާ ގޮތަށް އަދި ރައީސް އައްޔަންކުރައްވާ ފަރާތްތަކުގެ ނަންތައް މަޖިލީހަށް ހުށަހަޅައި ފާސްކުރަން ޖެހޭ ގޮތަށް ދެ ބިލު ސަރުކާރުން ވަނީ މަޖިލީހަށް ހުށަހަޅައިފަ އެވެ.
މިކަމާއި ގުޅިގެން މިއަދު އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، މި އިސްލާހަކީ 2008 ވަނަ އަހަރު ޢަމަލުކުރަން ފެށި ޤާނޫނުއަސާސީން ލިބިދީފައިވާ މިނިވަން ޑިމޮކްރެޓިކް ނިޒާމު ފުނޑުފުނޑުކޮށްލައި، ބާރުތައް ވެރިމީހާގެ މުށުތެރެއަށް ޖަމާކޮށް، ޚުދުމުޚްތާރު ވެރިކަމެއް ރާއްޖޭގައި ޤާއިމުކުރުމަށް މިހާރުގެ ސަރުކާރުންރުން ގެންގުޅޭ ނުރައްކާތެރި ސިއްރު އެޖެންޑާގެ ބައެއް ކަމަށެވެ.
"މިއީ ރާއްޖޭގެ ޑިމޮކްރަސީއަށް ފަހުގެ ތާރީޚެއްގައި ކުރިމަތިވަމުންދާ އެންމެ ބޮޑު ނުރައްކާ،"
އެމްޑީޕީގެ ރައީސް އަބްދުالله ޝާހިދު
ޝާހިދު ވަނީ، އިލެކްޝަންސް ކޮމިޝަނާއި އެންޓި ކޮރަޕްޝަން ކޮމިޝަން ރައީސުލްޖުމްހޫރިއްޔާގެ ބާރުގެ ދަށަށް ގެނެސް، ރާއްޖެ ބަލައިގެންފައިވާ ފުރިހަމަ ޑިމޮކްރެޓިކް ނިޒާމު ގަޑުބަޑުކުރުމަށް ކުރަމުންދާ މި މަސައްކަތްތައް ވަގުތުން ހުއްޓާލުމަށް ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
