އީރާނުގެ އަސްކަރިއްޔާގެ ބަޖެޓް ރެކޯޑް އަދަދަކަށް އިތުރުކުރުމަށް އެޤައުމުގެ ސަރުކާރުން ނިންމައިފިއެވެ.
މިކަން އީރާނު ސަރުކާރުގެ ތަރުޖަމާން ފާތިމަހް މޮހަޖެރާނީ ވަނީ އެޤައުމުގެ މީޑިއާތަކަށް ޔަގީންކޮށްދީފައެވެ. އޭނާ ވިދާޅުވީ އީރާނުގެ އަސްކަރިއްޔާގެ ބަޖެޓް %200 ބޮޑުކުރުމަށް ސަރުކާރުން ނިންމާފައިވާކަމަށެވެ.
އީރާނުގެ އަސްކަރީ ބަޖެޓަކީ މިހާރު، 10.3 ބިލިއަން ޑޮލަރެވެ. އަސްކަރިއްޔާގެ ބަޖެޓް %200 ބޮޑުކުރަން ނިންމުމުން އެ އަދަދު 30.9 ބިލިއަން ޑޮލަރަށް އަރާނެއެވެ. ފާތިމަހް މޮހަޖެރާނީ ވިދާޅުވީ އަސްކަރިއްޔާގެ ބަޖެޓް ބޮޑުކުރުމަށްޓަކައި ސަރުކާރުން ހުށަހަޅާފައިވާ ޕްރޮޕޯސަލް ޤާނޫނު ހަދާ މަޖިލީހަށް މިހާރު ވަނީ ހުށަހަޅާފައެވެ.
އީރާނު އެޤައުމުގެ އަސްކަރިއްޔާގެ ބަޖެޓް އިތުރުކުރުމަށް ނިންމާފައިވަނީ އިސްރާއީލާ ދެކޮޅަށް އެޤައުމުން ހަނގުރާމައަކަށް ނިކުމެދާނޭކަމަށް ހީވެފައިވަނިކޮށެވެ. އީރާނުގެ އަސްކަރިއްޔާގެ ބަޖެޓް ބޮޑުކުރަން ނިންމުމުން އެކަމުގެ ވާހަކަތައް އެންމެ އަވަހަށް ރިޕޯޓްކުރީ އިސްރާއީލްގެ މީޑިއާތަކުންނެވެ.
އީރާނުގެ އަސްކަރިއްޔާގެ ބަޖެޓް ބޮޑުކުރުމަށް އެޤައުމުގެ ސަރުކާރުން ނިންމި ނިންމުން، އިސްރާއީލުގެ މީޑިއާތަކުން ސިފަކޮށްފައިވަނީ ހަމާސް އަދި ހިޒްބުﷲ އަށް ފަންޑުކުރުމަށް ދުރާލާ ރާވައިގެން ހިންގާ އަމަލެއްގެ ގޮތުގައެވެ. އިސްރާއީލާއި އެމެރިކާއިން ސިފަކުރާގޮތުގައި ފަލަސްތީނުގެ މިނިވަންކަމަށް މަސައްކަތްކުރަމުންދާ ހަމާސް ޖަމާއަތަކީ ޓެރަރިސްޓް ޖަމާއަތެކެވެ.
ހަމާސްއިން އިސްރާއީލުގެ ނިރުބަވެރިންނަށް އަމާޒުކޮށް ހަމަލާދޭއިރު، އިސްރާއީލުގެ ނިރުބަވެރި ސިފައިން ހަމަލާތައްދެނީ ފަލަސްތީނުގެ އާއްމު ރައްޔިތުންނަށް އަމާޒުކޮށެވެ.
Advertisement
This content is created and paid for by advertisers and does not involve Voice Journalists
