ޓެކްސީގެ ހިދުމަތް ދިނުމަށް ކުންފުންޏަކާ ހަވާލުކުރަން ސަރުކާރުން ނިންމާފައިވާކަމަށް ޓްރާންސްޕޯޓް މިނިސްޓްރީން ބުނެފިއެވެ.
ރައްޔިތުން މަޖިލީހުގެ އިގްތިސާދީ ކޮމިޓީގައި މިއަދު ވާހަކަދައްކަވަމުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ، މާލެ ސަރަހައްދުގައި ޓެކްސީގެ ހިދުމަތް ދިނުމަށް ކުންފުންޏަކާ ހަވާލުކުރުމަށް ނިންމާފައިވާކަމަށެވެ.
ޓެކްސީ ޑްރައިވަރުންގެ އެސޯސިއޭޝަނުން ރައްޔިތުންގެ މަޖިލީހަށް ހުށަހެޅި ސިޓީއަކާ ގުޅޭގޮތުން ކުރެއްވި ސުވާލަކަށް ޖަވާބުދެއްވަމުން މިނިސްޓަރު އަމީން ވިދާޅުވީ ޓެކްސީގެ ހިދުމަތްދިނުމަށް ބަޔަކާ ހަވާލުކުރުމަށް ކުރިއަށްދާ މަސައްކަތްތަކުގެ ދަށުން ކުރިއަށްއޮތް ދެ ހަފްތާއެއްހާ ދުވަހުގެ ތެރޭގައި ކުންފުންޏަކާ ހަވާލުކުރައްވާނޭކަމަށް އަމީން ވިދާޅުވިއެވެ.
ޓެކްސީގެ ހިދުމަތް ދިނުމަށް ހަވާލުކުރާނީ، ސަރުކާރު ހިއްސާވާ ކުންފުންޏަކާ ކަމަށާއި، އެގޮތުން އެމްޓީސީސީއަކީ މިކަމަށް އެންމެ އެކަށޭނެ ކުންފުންޏެއްކަން މިނިސްޓަރު ފާހަގަކުރެއްވިއެވެ. ނަމަވެސް އެކަން ކުރުމަށް ހަވާލުކުރާނޭ ވަކި ކުންފުންޏެއްގެ ނަމެއް މިނިސްޓަރު ވިދާޅެއް ނުވެއެވެ.
ސަރުކާރުން ޓެކްސީގެ ހިދުމަތް ދިނުމަށް ވިސްނާފައިވަނީ އާރުޓީއެލް ބަހުގެ ހިދުމަތާ އެއްގޮތަށެވެ. އެގޮތުން ޓެކްސީ ހިދުމަތުގައި ތިބޭނޭ މުއައްޒަފުންގެ ތެރެއިން %50 މުއައްޒަފުން ދާއިމީ މީހުންގެ ގޮތުގައި ތިބޭއިރު އަނެއް ބައި މުއައްޒަފުން ތިބޭނީ އެކި ގަޑިތަކުގައި ޓެކްސީ ދުއްވުމަށް ބޭނުންވާ މީހުންނެވެ.
ޓެކްސީ ދުއްވުމުގެ ހުއްދަ ބިދޭސީންނަށް ނުލިބޭއިރު، ޑްރައިވަރުންނަށް ވަކި ތަނަކަށް ދިއުމަށް ދަތުރެއް ނުނެގޭނެއެވެ.
ޓެކްސީގެ ހިދުމަތަކީ ރައްޔިތުންގެ ޝަކުވާ ބޮޑު ހިދުމަތެކެވެ. ސަރުކާރުން ބުނެފައިވަނީ ޓެކްސީގެ ހިދުމަތް ސަރުކާރުންދޭނީ މޮނިޓަރކުރެވޭގޮތަށް ކޮމްޕިއުޓަރައިޒްޑް ކޮށެވެ.
Advertisement
This content is created and paid for by advertisers and does not involve Voice Journalists
