ރީތީގެ މުބާރާތް ތަކުގައި ބައިވެރިވުމަކީ ބޮޑު ފާފައެއް ކަމަށާ، އެކަންކަން ހުއްޓުވެން އޮތް ހުރިހާ ފަރާތަކުން އެކަން ހުއްޓުވަން ޖެހޭނެ ކަމަށް ދީނީ ޢިލްމުވެރިޔާ އައްޝެއިޚް އަބްދުއްސަލާމް ދާވޫދު ވިދާޅުވެއްޖެއެވެ.

ރާއްޖޭގެ ކުންފުންޏަކުން ފަހިކޮށްދިން ފުރުސަތެއްގައި، ރީތީގެ މުބާރާތް، މިސް ޔުނިވާސްގައި ރާއްޖޭގެ އަންހެނެއް ބައިވެރިވާ ޚަބަރު ރޭގެ ވަގުތެއްގައި ފެތުރިފައިވާއިރު، ދާރިސް ޓީވީން ރޭ ކުރިއަށް ގެންދިޔަ ޢިލްމީ ޚަޒާނާ ޕްރޮގްރާމްގައި ޝެއިޚް އަބްދުއްސަލާމް ވަނީ އެފަދަ ކަން ކަމުގައި ބައިވެރި ވުމާއި، އަދި އެކަމަށް މަގުފަހި ކުރުމުގެ ނުބައި ކަމުގެ މައްޗަށް އަލިއަޅުވާލައްވާފައެވެ.

އެގޮތުން، ރީތީގެ މުބާރާތް ތަކުގެ އެންމެ މައިގަނޑު އެއް މަގުސަދަކީ އެތަކެއް ބައެއްގެ ކުރިމަތީގައި އަންހެނާގެ ހަށިގަނޑާއި އޭނާގެ ވަނާތައް ހާމަކުރުން ކަން ޝެއިޚް ފާހަގަކުރެއްވިއެވެ. 

Advertisement

ކަން މިހެން ހުރި އިރު، ”ކަމާ ކަން ފަށައި، ބަރަހަނާ ވާންވެގެން، ތިމާގެ ގުނަވަންތައް ދައްކަންވެގެން ނުކުންނަ ނުތުން އެއީ“ މުއުމިނުންގެ މެދުގައި ފާހިޝް ޢަމަލު ފެތުރުމަށް ލޯބިކުރެވޭ ލޯބިކުރެވުމަކަށް ވެގެންދާނެ ކަމަށް ޝެއިޚް ވިދާޅުވިއެވެ. 

އެހެން ކަމުން، އެފަދަ ކަންކަމުގައި އަންހެނުން ބައިވެރި ކުރުވަން ގެންދަން މަސައްކަތް ކުރާ ކުންފުނި ތަކުން، އެ މަސައްކަތް ހުއްޓާލައި، މާތް الله އަށް ބިރުވެތި ވުމަށް ޝެއިޚް ވަނީ ގޮވާލައްވާފައެވެ.

”މާތް الله ވަޙީ ކުރައްވާފައިވާ ބަސްފުޅެއްގެ މާނާގައި ވޭ، އީމާން ކަމުގެ އަހުލުވެރިންގެ ތެރޭގައި ފާހިޝް ޢަމަލުތައް ފެތުރުމަށް ލޯބިކުރާ މީހުންނަށް، ދުނުޔެއާއި އާޚިރަތުގައި ވޭންދެނިވި އަޒާބު ދެއްވާނެ ކަމަށް.“

ޝެއިޚް އިތުރަށް ވިދާޅުވީ، ސައްތައިން ސައްތަ މުސްލިމް ގައުމެއްގެ ގޮތުގައި ރާއްޖެ އޮންނަ އިރު، ރާއްޖޭގެ ނަމުގައި އެފަދަ ކަންކަމުގައި ބައިވެރި ވުމަކީ ހިތާމަ ކުރަންޖެހޭ ކަމެއް ކަމަށެވެ. 

އަދި މިފަދަ ހާލަތެއްގައި ދައުލަތުގެ ކަންކަމާއި ހަވާލުވެވަޑައިގެން ތިއްބެވި ފަރާތްތަކުންވެސް، މާތް الله އަށް ބިރުވެތިވެ، މިކަންކަން ހުއްޓުވުމަށް ކުރަންޖެހޭ ކޮންމެ ކަމެއް ކުރުމަށް ޝެއިޚް ވަނީ ގޮވާލައްވާފައެވެ.