ރާއްޖޭގެ އެކި ސަރަހައްދުތަކުގެ ފަރަށް އަރާ ބޭރުގައުމުތަކުގެ ބޯޓުފަހަރުތައް ފުރައިގެންދާތީ ދައުވާ ނުކުރެވުމުގެ މައްސަލަ ބޮޑުވެއްޖެއެވެ.

އެންވަޔަރަމަންޓް އެންޑް ކްލައިމެޓް ޗޭންޖު ކޮމިޓީން މިއަދު ބޭއްވި ބައްދަލުވުމުގައި ވާހަކަދައްކަވަމުން އޭޖީ އޮފީހުގެ ކައުންސެލް ޖެނެރަލް ފާތިމަތު ހަލީމް ވިދާޅުވީ، ފަރަށް އަރާ ބޭރުގެ ބޯޓުފަހަރު ދައުވާ ކުރުމުގެ ކުރިން ފުރައިގެންދާ މައްސަލަ ބޮޑުވެފައިވާކަމަށެވެ. އެހެންވުމުން ބޯޓުފަހަރު ފަރަށް އެރުމުން ދައުލަތަށް ހޯދަންޖެހޭ ފައިސާ ހޯދުމުގައި ތަކުލީފްތަކެއް ކުރިމަތިވާކަމަށެވެ.

ބޯޓުތައް ފަރަށް އެރުމުގެ މައްސަލަތަށް ގިނަވާން ފެށީ މިދިޔަ ދެތިން އަހަރެއްގައިކަން ފާހަގަކުރައްވަމުން އޭނާ ވިދާޅުވީ ބޯޓު ފަރަށް އެރުމާ ގުޅޭގޮތުން 8 މައްސަލައެއް ލިބި އަދި ކޯޓުގައި 6 މައްސަލައެއް މިހާރުވެސް ކުރިއަށްދާކަމަށެވެ.

މިގޮތުން ބޯޓުފަހަރު ފަރަށް އެރުމުގެ މައްސަލަތަކަށް ބަލާއިރު، ދެ މައްސަލައެއް ފިޔަވައި އެހެން ހުރިހާ ފަރާތެއްގެ މައްސަލަތައް ކޯޓަށް ވައްދާފައިވާކަން އޭނާ ފާހަގަކުރެއްވިއެވެ.

އޭނާ އިތުރަށް ވިދާޅުވީ ގިނަ ފަހަރަށް ބޯޓުފަހަރުތަކަށް ދައުވާކުރަން ބަލާއިރު، ބޯޓުތައް ހުންނަނީ ފުިރުވާލާފައި ކަމަށެވެ. އެހާލަތުގައި އެފަރާތްތަކާ ދެކޮޅަށް ދައުވާކުރުމަށް ދަތިވެގެންދާކަމަށާއި، އެގޮތުން ދައުވާކުރަން ބޭނުންވާ ފަރާތްތަކުގެ އެޑްރެސްފަދަ މުހިއްމު މައުލޫމާތުތައް ހޯދަން ދަތިވާކަމަށް އޭނާ ވިދާޅުވިއެވެ. އެފަދަ ބޯޓުފަހަރު އޭޖެންޓެއް މެދުވެރިކޮށް އަންނައިރު، މިހާރު އޭޖެންޓުގެ މައްޗަށްވެސް ދައުވާކުރަމުން އަންނަކަން އޭނާ ވަނީ ފާހަގަކުރައްވާފައެވެ.

ފަރަށް އެރުމުގައި ރާއްޖެއިން ބޭރުގެ ބޯޓުފަހަރުގެ މައްސަލަތައް ބެލުމަށް އުނދަގޫވިނަމަވެސް ރާއްޖެއަށް ނިސްބަތްވާ ބޯޓުފަހަރުތަކުގެ މައްސަލަތައް ކުރިއަށްގެންދަން ފަސޭހަކަަމަށެވެ.

ބޯޓުފަހަރު ފަރަށް އަރައިގެން މިފަހުން އެންމެބޮޑު ޖޫރިމަނާއެއް ކޮށްފައިވަނީ ތިލަމާލެ ބްރިޖް ހަދަމުން އަންނަ އެފްކޮންސްގެ ބާޖު ވިލިމާލެ ފަރަށް އެރުމުން ކުރި ޖޫރިމަނާއެވެ. އެ މައްސަލާގައި އީޕީއޭއިން ވަނީ އެފްކޮންސް 69.4 މިލިއަން ރުފިޔާއިން ޖޫރިމަނާކޮށްފައެވެ. ނަމަވެސް އެފްކޮން އިން ވަނީ ޖޫރިމަނާ ބޮޑުކަމަށް ބުނެ އެ މައްސަލަ ސިވިލް ކޯޓަށް ހުށަހަޅާފައެވެ.

އީޕީއޭއިން މިހާތަނަށް ބޯޓެއް އެންމެ ބޮޑުއަދަދަކުން ޖޫރިމަނާކުރި އެއް މައްސަލައަކީ މީގެ ތިން އަހަރުކުރިން ކ.އަތޮޅު ރަސްފަރީ ހުޅަނގުފަރާތު ފަރަށް ޕަނަމާގެ ބޯޓެއް އެރުމުން ކުރި ޖޫރިމަނާއެވެ. އެ މައްސަލާގައި ޕަނަމާގެ އެ ބޯޓު ވަނީ 900 މިލިއަން ރުފިޔާއިން ޖޫރިމަނާކޮށް ފައިސާ ދެއްކުމަށް އަންގާފައެވެ.