ކުރިއަށްއޮތް 2025 ވަނަ އަހަރަށް ލަފާކޮށް ސަރުކާރުން 56.6 ބިލިއަން ރުފިޔާގެ ބަޖެޓެއް ރައްޔިތުންގެ މަޖިލީހަށް މިއަދު ހުށަހަޅައިފިއެވެ.

ފިނޭންސް މިނިސްޓަރު މޫސާ ޒަމީރު މިއަދު ވަނީ މަޖިލީހުގެ ތަޅުމަށް ވަޑައިގެން ސަރުކާރުން އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވާފައިވާއިރު، މިއީ މިއަހަރަށް ހުށަހެޅި ބަޖެޓަށްވުރެ، 6.8 ބިލިއަން ރުފިޔާގެ އިތުރުވުމެކެވެ. ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ.

އަންނަ އަހަރުގެ ބަޖެޓްގެ ޖުމްލަ ހަރަދުގެ ގޮތުގައި ހިނގާނޭކަމަށް ލަފާކޮށްފައިވަނީ، 49.2 ބިލިއަން ރުފިޔާއެވެ. އޭގެ ތެރޭގައި ރިކަރަންޓް ހަރަދުގެ ގޮތުގައި 35.8 ބިލިއަން ރުފިޔާ ހަރަދުވާނޭކަމަށް ލަފާކޮށްފައިވާއިރު، ކެޕިޓަލް ހަރަދުގެ ގޮތުގައި ބަޖެޓްގައި ޖަހާފައިވަނީ 13.4 ބިލިއަން ރުފިިޔާއެވެ. އަދި ޕީއެސްޕީއައި މަޝްރޫޢުތަކަށް ކަނޑައަޅާފައިވަނީ 12.4 ބިލިއަން ރުފިޔާއެވެ.

މިފަހަރުގެ ބަޖެޓުގައި ދައުލަތުގެ ޖުމްލަ އާމްދަނީ އާއި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނޭކަމަށް ވަނީ ލަފާކޮށްފައެވެ. އެއީ ޓެކްސް އާއި ފީގެ ގޮތުގައި 37.2 ބިލިއަން ރުފިޔާ އަދި ހިލޭ އެހީގެ ގޮތުގައި 2.5 ބިލިއަން ރުފިޔާ ލިބޭނޭކަމަށް ވަނީ ހިމަނާފައެވެ.

މިފަހަރުގެ ބަޖެޓާ ގުޅޭގޮތުން ވާހަކަދައްކަވަމުން މާލީ ވަޒީރު މޫސާ ޒަމީރު ވިދާޅުވެފައިވަނީ، ހަރަދުކުޑަކުރަން އަޅާ ފިޔަވަޅުތަކުން 6.6 ބިލިއަން ރުފިޔާ ކުޑަކުރެވިގެންދާނޭ ކަމަށެވެ. އެގޮތުން އަންނަ އަހަރު ދައުލަތުގެ ބަޖެޓް ޑެފިސިޓް ހުންނާނޭކަމަށް ލަފާކޮށްފައިވަނީ 9.4 ބިލިއަން ރުފިޔާގައެވެ. މިއީ ފަހުގެ ތާރީހެއްގައި ނިސްބަތުން އެންމެބޮޑަށް ޑެފިސިޓް ކުޑަވެގެންދާނޭ ބަޖެޓަށް ވާނޭކަމަށް ފިނޭންސުން ވަނީ ލަފާކޮށްފައެވެ.

ފިނޭނުންސުން ބުނީ ބަޖެޓް އެކުލަވާލާފައިވަނީ، ކަމާއި ބެހޭ އިދާރާތަކުގެ ބޭފުޅުންނާއި ވަކިވަކިން ބައްދަލުކުރައްވައި، ކެބިނެޓާއި އަދި ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހާއްސަ ބެއްލެވުމުގެ ދަށުންކަމަށެވެ. މިގޮތުން މިފަހަރުގެ ބަޖެޓަކީ ރައީސުލްޖުމްހޫރިއްޔާގެ ބެއްލެވުމުގެ ދަށުން ރައީސްގެ ބައިވެރިވުމާއެކު މިހާބޮޑަށް އެކުލަވާލެވުނު ބަޖެޓަށް ވާނޭކަމަށް ފިނޭންސް މިނިސްޓްރީން ބުންޏެވެ.

ފިނޭންސުން ބުނީ އަހަރުން އަހަރަށް ބަޖެޓް ބޮޑުވަމުންދާއިރު، އެކަމުން ރައްޔިތުންނަށް ކުރާ މަންފާއެއް ނޯންނަ ވާހަކައަކީ ރައްޔިތުން އަބަދުމެ ފާހަގަކުރަމުންދާ ޝަކުވާއެއް ކަމަށެވެ. ބައެއް ފަހަރު ބިނާތަކެއް އެޅުނު ނަމަވެސް ނިޒާމީގޮތުން އަހަރުން އަހަރަށް ކުރިއެރުންތަކެއް އާއްމު ރައްޔިތުންނަށް ލިބޭކަހަލަ ގޮތަކަށް ބަޖެޓުން ހަރަދުކުރެވިފައި ނުވާކަމަށް ބަޖެޓް ތައްޔާރުކުރި ފިނޭންސްގެ ޓީމުން ވަނީ ބުނެފައެވެ.

ފިނޭންސުން ބުނީ އެއްބަޖެޓުން އެބާވަތުގެ ކަންކަން ހައްލުނުވިނަމަވެސް، ކުރިއަށްއޮތް އަހަރުގެ ބަޖެޓް އެކުލަވާލާފައިވާނީ، އެކަންކަން ހައްލުކުރުމަށްޓަކައި އަޅާނެ ފިޔަވަޅުތަކާވެސް އެކުގައި ކަމަށެވެ.