އިންޑިއާގެ ޖޭއެސްޑަބްލިއު ސްޓީލް އިން ދެކުނު ކޮރެއާގެ އެކަތަ އުފައްދާ އެންމެ ބޮޑު ކުންފުނި ޕޮސްކޯއާ އެކު އަހަރަކު ފަސް މިލިއަން މެޓްރިކް ޓަނުގެ އެކަތަ އުފެއްދޭ އިންޓަގްރޭޓެޑް ސްޓީލް ޕްލާންޓެއް ގާއިމުކުރުމުގެ އެއްބަސްވުމެއްގައި ސޮއިކޮށްފިއެވެ.
ޖޭއެސްޑަބްލިއު ސްޓީލް އަކީ ކެޕޭސިޓީގެ ގޮތުން އިންޑިއާގައި އެކަތަ އުފައްދާ އެންމެ ބޮޑު އެއް ކުންފުންޏެވެ. މި އެއްބަސްވުމުގެ ދަށުން ސްޓީލް ޕްލާންޓްގެ އިތުރުން އިލެކްޓްރިކް އުޅަނދުތަކަށް ބޭނުންވާ ބެޓެރީ މެޓީރިއަލްއާއި އިއާދަކުރަނިވި ހަކަތަ އުފެއްދުމަށް ޕޮސްކޯއާ ގުޅިގެން މަސައްކަތް ކުރާނެ ކަމަށް އެ ކުންފުނިން ބުނެއެވެ. 1.8 މިލިއަން މެޓްރިކް ޓަނުގެ އެކަތަ އުފައްދާ ޕްލާންޓެއް މަހާރަޝްތުރަ ސްޓޭޓްގައި މިހާރުވެސް ޕޮސްކޯ އިން ހިންގައެވެ. މި އުފެއްދުންތައް ސަޕްލައިކުރަނީ އިންޑިއާގެ އޮޓޯމޯޓިވް އިންޑަސްޓްރީގެ ކުންފުނިތަކަށެވެ.
އިންޑިއާގެ އޮޑީޝާ ސްޓޭޓްގައި 12 ބިލިއަން ޑޮލަރުގެ އެކަތަ ޕްލާންޓެއް ގާއިމްކުރުމަށް މީގެ އަހަރުތަކެއް ކުރިންވެސް ޕޮސްކޯއިން މަސައްކަތްކުރިއެވެ. މިއީ އިންޑިއާގެ އެންމެ ބޮޑު ފޮރިން އިންވެސްޓްމަންޓަށް ވާނެކަމަށް އޭރު ބެލެވުނެވެ. އަހަރަކު 12 މިލިއަން މެޓްރިކް ޓަނުގެ އެކަތަ އުފެއްދުމުގެ ގާބިލްކަމާއެކު ގާއިމްކުރަން އުޅުނު ޕްލާންޓްގެ މަސައްކަތް ހުއްޓާލަން ޖެހުނީ އެކަމަށް ބޭނުންވާ ބިން ހޯދުމަށް ކުރި މަސައްކަތަށް ދިމާވި ގޮންޖެހުންތަކާ ގުޅިގެންނެވެ.
2022 ވަނަ އަހަރު ޕޮސްކޯ އިން ވަނީ ގުޖުރާތު ސްޓޭޓްގައި 5 ބިލިއަން ޑޮލަރު އިންވެސްޓްކޮށްފައެވެ. އެފަހަރު އިންވެސްޓްކޮށްފައިވަނީ ގައުތަމް އަދާނީގެ އަދާނީ ގްރޫޕާއެކު މަސައްކަތްކުރުމަށެވެ.
Advertisement
This content is created and paid for by advertisers and does not involve Voice Journalists
