އެންމެ ބާރު ސްޕީޑްގައި ކުރިއަރަމުން އަންނަ އިގްތިސާދުގެ މަގާމު އިންޑިއާއިން ދިފާއުކޮށްފިއެވެ.

ނިމުނު ހަފްތާ ބަންދުގައި އާއްމުކުރި ބައިނަލްއަގްވާމީ މާލީ އިދާރާ އައި.އެމް.އެފް ގެ އޭޝިއާ ޕެސިފިކް ރީޖަނަލް އައުޓްލުކްގައި ބުނީ އިންވެސްޓްމަންޓްތައް އިތުރުވެ، ޕްރައިވެޓް ސެކްޓަރ ކުރިއެރުމުގެ ސަބަބުން އިންޑިއާގެ އިގްތިސާދަށް ކުރިއެރުން ލިބެމުން އަންނަ ކަމަށެވެ.

މިދިޔަ މަހު ނެރުނު ރިޕޯޓެއްގައިވެސް އައި.އެމް.އެފް އިން ވަނީ އަންނަ އަހަރު އިންޑިއާގެ ޖީ.ޑީ.ޕީ 7 އިންސައްތަ ކުރިއަރައި، ޖެހިގެން އަންނަ އަހަރު 6.5 އިންސައްތަ ކުރިއަރާނެކަމަށް ލަފާކޮށްފައެވެ. ކޮވިޑް-19 އަށްފަހު އައި އިގްތިސާދު ރިކަވަރކުރުމުގެ މޫސުން ނިމުމަކަށް އައުމާއި، އާބާދީއަށް އަންނަ ބަދަލުތަކާއެކު، ޖުމްލަކޮށް މިސަރަހައްދުގެ އިގްތިސާދު ފުޅާވަމުން އަންނަ ސްޕީޑް ކޮންމެވެސް ވަރަކަށް މިއަހަރުން ފެށިގެން މަޑުޖެހޭނެކަމަށް ތަޖުރިބާކާރުން ލަފާކުރެއެވެ.

މުޅި ދުނިޔޭގެ މިދިޔަ އަހަރުގެ އިގްތިސާދީ ކުރިއެރުމުގެ 60 އިންސައްތަ ހިއްސާކުރަނީ އޭޝިއާ ޕެސިފިކް ސަރަހައްދެވެ.

އިގްތިސާދު ރަނގަޅުވަމުން އައިނަމަވެސް، ވަޒީފާ އުފެއްދުމުގެ ނިސްބަތް އިތުރު ނުކުރެވޭނަމަ މުޅި ބައިނަލްއަޤްވާމީ އިގްތިސާދަށް އެކަމުގެ ނޭދެވޭ އަސަރުކުރާނެކަމުގެ އިންޒާރު ދާދި ފަހުން އިންޑިއާގެ މާލީ ވަޒީރު ނިރްމަލާ ސިތާރަމަން ވަނީ ދެއްވާފައެވެ. އަދި އެކަމަށް ހައްލެއް ހޯދުމަށް ވޯލްޑް ބޭންކަށް އެކަމަނާ ވަނީ ގޮވާލައްވާފައެވެ.