އަރަބިއްޔާ ސްކޫލުގެ އާ އިމާރާތުގެ މަޝްރޫއު ލަސްވެފައިވަނީ މަޝްރޫއުގެ އަގަށްވުރެ 80 މިލިއަން ރުފިޔާ އިތުރަށް ހޭދަކުރަން ޖެހޭތީ، އެ ފައިސާ ސަލާމަތްކުރުމަށް ކަމުގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.

މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ޝަފީއު ވިދާޅުވީ، މި ވެރިކަން އައި އިރު، ޢަރަބިއްޔާ ސުކޫލު އެޅުމަށް ނިންމާފައި އޮތީ ބާ ޖަމާލުއްދީން ހުންނަ ބިމުގައި ކަމަށެވެ.

އެހެންނަމަވެސް، ރަޢިސުލްޖުމްހޫރިއްޔާ ވަނީ، ޢަރަބިއްޔާ ސުކޫލުގެ ބެލެނިވެރިންގެ އެދުމާއެކު މާލޭގެ ތަނަވަސް ސަރަހައްދަކުން، އެ ސުކޫލަށް ބިމެއް ހަމަޖައްސަވާފައިވާ ކަން ވަޒީރު ފާހަގަކުރެއްވިއެވެ.

Advertisement

މިއާއެކު ވަޒީރު ވިދާޅުވީ، އެ މަޝްރޫއުގެ ސްކޯޕަށް އައި ބަދަލާއެކު، ޒަމާނީ ވަސީލަތްތަކާއެކު އަރަބިއްޔާގެ އާ އިމާރާތް އެޅުމާ ގުޅޭގޮތުން ކޮންޓްރެކްޓަރާއެކު މަޝްވަރާކުރެވި އަގުތަކެއް އެ ފަރާތުން ހުށަހެޅި ކަމަށެވެ. އެހެން ނަމަވެސް، ހުށަހެޅި އަގުތައް މާބޮޑުވެފައިވާ ކަމަށެވެ.

ވަޒީރު ވިދާޅުވީ، އެ 80 މިލިއަން އިތުރަށް ޚަރަދުކޮށއގެން ކުރިއަށް ގެންދިޔަ ނަމަ، ޕްލޭނާއު އެއްގޮތަށް މަސައްކަތް ކުރިއަށް ދިޔައީސް ކަމަށާ، އެހެން ނަމަވެސް، ރައްޔޮތުންގެ ފައިސާއަކީ އަގުބޮޑު އެއްޗެއް ކަމަށެވެ.

އަދި މިވަގުތު އަރަބިއްޔާގެ ދަރިވަރުން ކިޔަވަމުންދާ ދަރުމަވަންތަ އިމާރާތުގައި އިންސާނީ ހައްގުތަކާއި ތައުލީމީ ގޮތުން މާބޮޑު ގެއްލުމެއް ނެތް ކަމަށާއި، ބެލެނިވެރިންނާއި ޕީޓީއޭއާވެސް މިކަން ހިއްސާކޮށްފައިވާ ކަމަށް ވަޒީރު ވިދާޅުވިއެވެ. 

ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުން އަރަބިއްޔާ ސްކޫލުގެ އާ އިމާރާތް އެޅުމަށް ނިންމާފައި އޮތީ ބާޖަމާލުއްދީން ސްކޫލު ހިންގި ބިމުގައެވެ. އެގޮތުން 2022 ވަނަ އަހަރުގެ ސެޕްޓެމްބަރު މަހު އަމީން ކޮންސްޓްރަކްޝަނާ މަސައްކަތް ހަވާލުކުރެވުނެވެ. ނަމަވެސް ރައީސް ޑރ. މުހައްމަދު މުއިއްޒުގެ ސަރުކާރުން ވަނީ މާލޭގެ ކުރީގެ ކުނިކޮށި ހިންގި ބިމުގައި އަރަބިއްޔާގެ އާ އިމާރާތް އެޅުމަށް ނިންމައި، މި އަހަރުގެ ފެބްރުއަރީ 24 ވަނަ ދުވަހު އިމާރާތުގެ ބިންގާ އަޅައިފައެވެ.