ނިމިގެންދިޔަ ތިންވަނަ ކުއާޓަރުގައި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްޓީޑީސީއަށް ސާފްފައިދާގެ ގޮތުގައި 3.5 މިލިއަން ރުފިޔާ ލިބިއްޖެއެވެ.

ސަރުކާރާއި ރައްޔިތުން ހިއްސާވާ ޓޫރިޒަމް ކުންފުނިން ނެރެފައިވާ ތިންވަނަ ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި ވިޔަފާރި ހިންގައިގެން އާމްދަނީގެ ގޮތުގައި ވަނީ، 1.3 މިލިއަން ޑޮލަރު ނުވަތަ 20.3 މިލިއަން ރުފިޔާ ލިބިފައެވެ. ހަރަދުތަކަށް ކެނޑުމަށްފަހު ވިޔަފާރި ހިންގައިގެން 364،574 ޑޮލަރު ނުވަތަ 5.6 މިލިއަން ރުފިޔާ ލިބުނުއިރު، ޓެކްސްއަށް ކެނޑުމުގެ ކުރިން ފައިދާގެ ގޮތުގައި ވަނީ، 402،689 ޑޮލަރު ނުވަތަ ދިވެހި ފައިސާއިން ބަލާނަމަ 6.2 މިލިއަން ރުފިޔާ ލިބިފައެވެ.

ޓެކްސްގެ ގޮތުގައި 60،403 ޑޮލަރު ކެނޑުމަށްފަހު، މި މުއްދަތުގެ ތެރޭގައި އެމްޓީޑީސީއަށް ސާފްފައިދާގެ ގޮތުގައި ލިބިފައިވަނީ، 342،286 ޑޮލަރު ނުވަތަ 5.3 މިލިއަން ރުފިޔާއެވެ.

Advertisement

އެމްޓީޑީސީގެ ބެލެންޝީޓްގެ އުސްއަލިތަކަށް ބަލާއިރު، ކުރެވުނު ވިޔަފާރިން އެހެން ފަރާތްތަކަށް ދައްކަންޖެހޭ ފައިސާގެ އަދަދު ދަށްވިނަމަވެސް ސަރުކާރަށް އެކަނިވެސް އަދިވެސް 6.6 މިލިއަނަށްވުރެ ގިނަ ޑޮލަރު ނުވަތަ 102 މިލިއަނަށްުވެ ގިނަ ރުފިޔާ ދައްކަންޖެހެއެވެ.

މީގެ އިތުރުން ވިޔަފާރިން އެހެން ފަރާތްތަކަށް ދައްކަންޖެހޭ 78 މިލިއަނަށްވުރެ ގިނަ ރުފިޔާ އަދިވެސް އެބައޮތެވެ. އެމްޓީޑީސީއަށް ލިބެންޖެހޭ ފައިސާއަށް ބަލާއިރު، 36 މިލިއަނަށްވުރެ ގިނަ ރުފިޔާ ލިބެން ޖެހެއެވެ.

އެމްޓީޑީސީއަކީ ޓޫރިޒަމްގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމަށް 2006 ވަނަ އަހަރު ރައީސް މައުމޫން ވެރިކަމުގައި އުފެއްދި ކުންފުންޏެކެވެ.