މޯލްޑިވްސް ނެޝަނަލް ޗެމްބާ އޮފް ކޮމާސް އެންޑް އިންޑަރސްޓްރީ (އެމްއެންސީސީއައި) އިން އެމްއެމްއޭގެ، ޑޮލަރު މާރުކުރުމުގެ ސިޔާސަތަށް 100 ޕަސެންޓް ތާއީދުކުރާކަމަށް އެ ޖަމިއްޔާއިން ބުނެފިއެވެ.

ވޮއިސް އާ ވާހަކަދައްކަވަމުން ދިވެހި ވިޔަފާރިވެރިންގެ ގައުމީ ޖަމިއްޔާގެ ނައިބު ރައީސް އިސްމާއީލް އާސިފް ވިދާޅުވީ، ޑޮލަރު މާރުކުރުމުގެ އައު އުސޫލަށް ވިޔަފާރިވެރިންގެ ޤައުމީ ޖަމިއްޔާއިން ފުރިހަމަޔަށް ތާއީދުކުރާކަމަށެވެ. އާސިފް ވިދާޅުވީ، ރާއްޖެއަކީ 100 ޕަސެންޓް އިމްޕޯޓަށް ބަރޯސާވާ ގައުމެއް ކަމަށާއި، ހުރިހާ އެއްޗެއް އިމްޕޯޓްކުރެވެނީ ޑޮލަރު ހުރެގެން ކަމަށެވެ. 

އާސިފް ވިދާޅުވީ ޑޮލަރު ލިބުމުގެ ދަތިކަން އެންމެބޮޑަށް ތަހައްމަލުކުރަންޖެހޭ ފަރާތްތަކުގެ ތެރޭގައި އެޖަމިއްޔާގެ މެމްބަރުން ހިމެނޭކަމަށާއި، ޑޮލަރު މާރުކުރުމަށް ރައީސް ޑރ.މުއިއްޒުގެ ސަރުކާރުން ކަނޑައެޅި އައު އުސޫލަކީ މިވަގުތަށް ކޮންމެހެންވެސް ތަންފީޒުވުން މުހިއްމު ސިޔާސަތެއް ކަމަށެވެ. އާސިފް ވިދާޅުވީ ޑޮލަރު މާރުކުރުމުގެ އެ ސިޔާސަތު ދެމެހެއްޓުމަށް ރައީސް އެޅުއްވުމަށް ނިންމި ފިޔަވަޅަކީ ގައުމީ ވިސްނުމަކުން ނިންމެވި މުހިއްމު ފިޔަވަޅެއް ކަމަށެވެ. 

Advertisement

ޑޮލަރު މާރުކުރުމުގެ އައު ގަވައިދާ މެދު ޓޫރިޒަމްގެ ބޮޑެތި ވިޔަފާރިވެރިން ނުރުހުން ފާޅުކުރިނަމަވެސް ރައީސް ޑރ.މުހައްމަދު މުއިއްޒު ރޭ ވަނީ، ޑޮލަރު މާރުކުރުމުގެ އުސޫލަށް ބަދަލު ގެންނަން ނުވިސްނާކަމަށް ވިދާޅުވެފައެވެ. އެގޮތުން އަންނަ އަހަރުގެ ޖެނުއަރީމަހުގެ 1 ވަނަ ދުވަހުން ފެށިގެން އެ ގަވާއިދަށް އަމަލުކުރަމުންދާނޭކަމަށް ރައީސް ރޭ ވަނީ ވިދާޅުވެފައެވެ.

މަނީޗޭންޖިން ވިޔަފާރިއާ ބެހޭ ޤަވައިދުގެ ދަށުން އެމްއެމްއޭއިން ވަނީ ރާއްޖޭގައި ޓޫރިޒަމް ވިޔަފާރިކުރާ ތަންތަނަށް، އެތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރުމަށް ލާޒިމްކޮށްފައެވެ. އެގޮތުން ކެޓަގަރީ އޭގައި ހިމެނޭ، ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް އެފަދަ ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހޭ ގޮތަށް ވަނީ ހަމަޖައްސާފައެވެ.

ކެޓަގަރީ ބީގައި ހިމެނޭ ތަންތަނުން މާރުކުރަންޖެހޭކަމަށް ކަނޑައަޅާފައިވަނީ ޓޫރިސްޓަކަށް 25 ޑޮލަރެވެ. ކެޓަގަރީ ބީގެ ގޮތުގައި ކަނޑައަޅާފައިވަނީ 50 ކޮޓަރި، ނުވަތަ އެއަށްވުރެ މަދުން ކޮޓަރި ހުންނަ ތަންތަނެވެ.