ދިވެހި ފުޓްބޯޅައިގެ ރަސްގެފާނުގެ ގޮތުގައި ގިނަބަޔަކު ސިފަކުރާ ނިއުރޭޑިއަންޓް ސްޕޯޓްސް ކްލަބުގެ އައު ޗެއާމަނަކަށް ރީޖަނަލް އެއާޕޯޓްސް ކުންފުނީގެ މެނޭޖިން ޑިރެކްޓަރު، އަހްމަދު މުބީން އިންތިހާބުކޮށްފިއެވެ.

ނިއުގެ އައު ޗެއާމަނަކަށް މުބީން އިންތިހާބުކޮށްފައި ވަނީ، ރޭ ދަރުބާރުގޭގައި ބޭއްވުނު އެ ކްލަބުގެ ކޮންގްރެސްގައެވެ. ކޮންގްރެސްގައި މަގާމުތަކަށް މެމްބަރުން ހޮވާފައިވަނީ އަތް ހިތްލައިގެން ވޯޓު ދޭ އުސޫލުންނެވެ. އެއީ ފެންނަ ނުފެންނަ ގޮތަށް ނިންމައިގެންނެވެ. 

ނިއުގެ ސީނިއާ ވައިސް ޗެއާމަންގެ މަގާމަށް އައްޔަނުކޮށްފައިވަނީ، ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް (ކައްޕި) އަދި ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލް (މުޖޭ) އެވެ. އަދި ވައިސް ޗެއާމަނަކަށް އައްޔަނުކޮށްފައިވަނީ، އަލީ ރަޝީދެވެ.

ރޭ ބޭއްވި ނިއުގެ ކޮންގްރެސްގައި ވާހަކަދައްކަވަމުން ކްލަބްގެ ޗެއާމަންކަމާ އަލަށް އިންތިހާބުކުރެވުނު އަހުމަދު މުބީން ވިދާޅުވީ، އެންމެ ފުރަތަމަ އަމާޒަކަށް ވާނީ ނިއުރޭޑިއަންޓް ދަރަނިން ސަލާމަތްކުރުން ކަމަށެވެ. ނިއުރޭޑިއަންޓާ ހަވާލުވީ ކްލަބް އޮތް ހާލަތު ވަރަށް ރަނގަޅަށް އެނގިގެން ކަމަށާއި އުއްމީދަކީ ނިއު ފުރަތަމަ ޑިވިޝަނަށް ގެނެސް، ކުރިން ފެނުނުގޮތަށް ކްލަބް ފެނިގެންދިއުންކަމުގައި މުބީން ފާހަގަކުރެއްވިއެވެ.

އިތުރަށް ވާހަކަދައްކަމުން މުބީން ވިދާޅުވީ އުއްމީދަނީ ނިއުއެކޭ އެއްފަދައިން ކަލްބް ވެލެންސިއާ އަދި ވިކްޓްރީ ސޕޯޓްސް ކަލްބްވެސް އެ ކްލަބްތަކުގެ ގޮތުގައި ފެނިގެންދިއުން ކަމަށާއި ރާއްޖޭގެ ފުޓްބޯޅައިގެ ފޯރި ގަދަވާން އޮތީ، އެ ކްލަބްތަކުގެ މެދުގައި އިހު އޮތް ފަދަ ވާދަވެރިކަމަކާ ހިސާބަށް ދެވިގެންކަމަށެވެ.

ރޭ ބޭއްވި ކޮންގްރެސްގައި ނިއުގެ ކުރީގެ ލެޖެންޑަރީ ކުޅުންތެރިންނާއި ކްލަބްގެ ހިދުމަތްތެރީންގެ އިތުރުން ފުޓްބޯޅަ އާއިލާއަށް ނިސްބަތްވާ ގިނަ އަދަދެއްގެ މީހުން ބައިވެރިވިއެވެ.