މިއަހަރުގެ މިހާތަނަށް ރާއްޖެއަށް 1.8 މިލިއަން ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އާއްމުކުރާ ފަތުރުވެރިކަމުގެ ޑެއިލީ ރިޕޯޓްސްއިން ދައްކާގޮތުން އިއްޔެގެ ނިޔަލަށް ރާއްޖެއަށް ޖުމްލަ 1,797,028 ފަތުރުވެރިން ވަނީ ޒިޔާރަތްކޮށްފައެވެ. އެހެންކަމުން ރާއްޖެއަށް 1.8 މިލިއަން ފަތުރުވެރިން ޒިޔާރަތްކުރުމަށް ބޭނުންވަނީ 2،972 ފަތުރުވެރިންނެވެ. މިހާރު ރާއްޖެއަށް ކޮންމެދުވަހަކު ފަތުރުވެރިން ޒިޔާރަތްކުރާ އަދަދަށް ބަލާއިރު، އަހަރުގެ މިހާތަނަށް ރާއްޖެއަށް 1.8 މިލިއަން ފަތުރުވެރިން ޒިޔާރަތްކުރިކަން މިއަދުގެ މިހާހިސާބަށް އާއިރު ވަނީ ޔަގީންވެފައެވެ. އިއްޔެ އެކަނިވެސް ރާއްޖެއަށް 6،760 ފަތުރުވެރިން ޒިޔާރަތްކުރިއެވެ.

ވީއައިއޭގެ ފްލައިޓް ސްޓޭޓަސްއަށް ބަލާއިރު، މިއަދަށް ރާއްޖެއަށް އައުމަށް ޝެޑިއުލްކުރި ފްލައިޓްތަކުގެ ތެރެއިން ގިނަ ފްލައިޓްތައް ވަނީ ލޭންޑްކޮށްފައެވެ.

ޓޫރިޒަމް މިނިސްޓްރީގެ ތަފާސްހިސާބަށް ބަލާއިރު، މިދިޔަ އަހަރާ އަޅާބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް ވަނީ، 9.2 އިންސައްތައިގައި ކުރިއަށް ޖެހިލާފައެވެ. 

ތަފާސްހިސާބަށް ބަލާއިރު، މިމަހުގެ މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ މިދިޔަ އާދިއްތަ ދުވަހުއެވެ. އެދުވަހު ރާއްޖެއަށް 7,001 ފަތުރުވެރިން ވަނީ ޒިޔާރަތްކޮށްފައެވެ.

މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދަށް ބަލާއިރު، އެންމެ ގިނައިން ރާއްޖެއަށް ޒިޔާރަތްކޮށްފައިވަނީ ޗައިނާގެ ފަތުރުވެރިންނެވެ. އަހަރުގެ މިހާތަނަށް ޗައިނާއިން ރާއްޖެއަށް 248,141 ފަތުރުވެރިން ވަނީ ޒިޔާރަތްކޮށްފައެވެ. ޗައިނާގެ އިތުރުން ދެން އެންމެގިނައިން ރާއްޖެއަށް ފަތުރުވެރިން ޒިޔާރަތްކޮށްފައިވަނީ، ރަޝިއާ އަދި އިނގިރޭސިވިލާތެވެ.

މި އަހަރު ނިމުމުގެ ކުރިން ރާއްޖެއަށް 2 މިލިއަން ފަތުރުވެރިން ގެނައުމަކީ ސަރުކާރުގެ އަމާޒެކެވެ.