ބަންގްލަދޭޝްގެ ކާޑުގެ ސަޕްލައި ހަމަޔަކަށް އެޅުވުމަށް އިންޑިއާއިން އަނެއްކާވެސް 50 ހާސް ޓަނުގެ ހަނޑޫ އެތެރެކުރުމަށް ބަންގްލަދޭޝްގެ ވަގުތީ ސަރުކާރުން ނިންމައިފިއެވެ.
ބަންގްލަދޭޝްގެ ވަގުތީ ވެރިކަންކުރާ އެޑްވައިޒަރީ ކައުންސިލުން ނިންމައިގެން އެތެރެކުރާ ހަނޑޫ ގަންނާނީ ޓަނެއް 471.6 ޑޮލަރުގެ އަގަކަށެވެ. މިދިޔަ ނޮވެމްބަރު މަހު އެހެން ކުންފުންޏެއް މެދުވެރިކޮށްވެސް 50 ހާސް ޓަނުގެ ހަނޑު އެތެރެކުރުމަށް އެގައުމުން ނިންމިއެވެ. އޭރު ޓަނެއް ގަނެފައިވަނީ 477 ޑޮލަރުގެ އަގަކަށެވެ.
ބަންގްލަދޭޝްގެ ކާބޯތަކެއްޗާއި ބެހޭ ވުޒާރާގެ ތަފާސްހިސާބުތައް ދައްކާގޮތުން ނޮވެމްބަރު މަހުގެ 20 ވަނަ ދުވަހުގެ ނިޔަލަށް އެގައުމުގައި ރައްކާކޮށްފައިވާ ކާޑުގެ ބާވަތްތަކުގެ ބުރަދަނަކީ 12.36 ލައްކަ ޓަނެވެ. އޭގެ ތެރެއިން 8 ލައްކަ ޓަނަކީ ހަނޑުލެވެ.
ބަންގްލަދޭޝްގެ ސަރުކާރުން މިއަހަރު ޖުމްލަ 5 ލައްކަ ޓަނުގެ ހަނޑޫ އިންޑިއާއިން އެތެރެކުރުމަށް ނިންމާފައިވެއެވެ. މީގެ ތެރޭގައި އިންޑިއާގެ ކުންފުނިތަކުން ގަންނަ ހަނޑުލާއި، އިންޑިއާ ސަރުކާރާއި ގުޅިގެން އެތެރެކުރާ ހަނޑޫ ހިމެނެއެވެ.
މީގެ އިތުރުން އިއްޔެ ބަންގްލަދޭޝް ސަރުކާރުން ވަނީ ލިކުއިފައިޑް ނެޗުރަލް ގޭސް އަދި ދަނޑުވެރިކަމަށް ބޭނުންވާ ފަރޓިލައިޒަރ އެތެރެކުރުމަށް ނިންމާފައެވެ. ބަންގްލަދޭޝް ސަރުކާރުން ލިކުއިފައިޑް ނެޗުރަލް ގޭސް ގަތުމަށް ނިންމާފައިވަނީ ވިޓޯލް ކުންފުނިންނެވެ.
Advertisement
This content is created and paid for by advertisers and does not involve Voice Journalists
