ސަރުކާރުގެ ހަރަދުތައް ކުޑަކުރުމަށް ކުރަމުންގެންދާ މަސައްކަތުގެ ދަށުން މިހާތަނަށް ސިޔާސީ 228 މުއައްޒަފަކު ވަކިކޮށްފައިވާކަން ރައީސުލްޖުމްހޫރިއްޔާގެ އޮފީހުން ޔަގީންކޮށްދީފިއެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން އަހުމަދު އަފްރާހު އިސްމާއީލް ނަމަކަށް ކިޔާ އަމިއްލަ ފަރާތަކުން ވަނީ ވަކިކުރި ސިޔާސީ މުއައްޒަފުންގެ އަދަދާއި އެމީހުންގެ ނަންތަށް ހޯދުމަށް ހުށަހަޅާފައެވެ. އެކަމާ ގުޅޭގޮތުން ރައީސް އޮފީހުން އެފަރާތަށް ފޮނުވި ޖަވާބު ލިޔުމުގައި ބުނެފައިވަނީ، މި ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން މިއަހަރުގެ އޮކްޓޯބަރުމަހުގެ 31 ވަނަ ދުވަހުގެ ނިޔަލަށް ސިޔާސީ 228 މުއައްޒަފަކު މަގާމުން ވަކިކޮށްފައިވާކަމަށެވެ. 

ރައީސް އޮފީހުން ބުނީ އެފަރާތުން އެދިފައިވާ މައުލޫމާތުގެ ތެރެއިން ސިޔާސީ މުއައްޒަފުންގެ ނަމަކީ ޒާތީ މައުލޫމާތަށްވެފައި، އެފަރާތުން މަސައްކަތްކުރި ވުޒާރާތަކުގެ ނަންތަކުގެ މައުލޫމާތަކީ މައުލޫމާތު ހޯދައި ލިބިގަތުމުގެ ދަށުން ދޫކުރެވޭނެ މައުލޫމާތެއް ނޫންކަމަށެވެ.

Advertisement

އަދި ހޯދަން އެދުނު މައުލޫމާތުތަކުގެ ތެރެއިން ވަކިކުރެވުނު މުއައްޒަފުންގެ މަގާމުތަކުގެ ނަންތަކާއި ވަކިކުރެވުނު އަދަދުގެ ތަފްސީލާއި މުއައްޒަފުން ވަކިކުރުމުގެ ސަބަބުން ދައުލަތުގެ ބައިތުލްމާލުން ސަލާމަތްކުރެވޭނެ އދަދަު ރައީސުލްޖުމްހޫރިއްޔާގެ އެކްސް ޕޯސްޓްތަކުން ފެންނާނޭ ކަމަށެވެ.

ސަރުކާރުގެ ހަރަދުތައް ކުޑަކުރުމުގެ ގޮތުން ސިޔާސީ 200 އަށްވުރެ ގިނަ ސިޔާސީ މީހުން ވަޒީފާއިން ވަކިކުރުމަށް ނިންމަވައި އެކަން ރައީސް ޑރ.މުއިއްޒު ނިންމެވީ އޮކްޓޯބަރުމަހުގެ 15 ވަނަ ދުވަހުއެވެ. އޭގެ ތެރޭގައި ހިމެނެނީ 7 ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި، 109 ސީނިއާ ޕޮލިޓިކަލް ޑިރެކްޓަރުންނާއި 69 ޕޮލިޓިކަލް ޑިރެކްޓަރުންނެވެ.