ސީރިއާގެ ރައީސް ބަޝާރުލް އަސަދު ގައުމުން ފިލުމާއެކު، އިދިކޮޅު ފަރާތްތަކުން ރިޔާސީ ގަނޑުވަރަށް ވަދެ، އަސަދުގެ ތަކެތި ލޫޓުވާން ފަށައިފިއެވެ.

މިކަމާ ގުޅޭ ގިނަ ވީޑިއޯތަކެއް މިހާރު ވަނީ މީސް މީޑިއާގައި އާއްމުވެފައެވެ.

އެގޮތުން، އިދިކޮޅު ފަރާތްތަކުން ބަޝާރުގެ ފޮޓޯއަށް ފައިން އަރައި، ރިޔާސީ ގަނޑުވަރަށްވަދެ، އެތަނުގައި ހުރި ބައެއް ތަކެތި ހަލާކުކޮށް އަނެއްބައި ތަކެތި ހިފައިގެންދާތަން ފެނެއެވެ.

މީގެ އިތުރުން އިދިކޮޅު ފަރާތްތަކުން ވަނީ ދިމިޝްގުގައި ހުރި އަސަދުގެ ބޮޑު ސްޓެޗޫވެސް ވައްޓާލައި އެ ހަލާކު ކޮށްލާފައެވެ. 

ސީރިއާގެ މުހިންމު އެއް ސިޓީ ކަމަށްވާ ހޮމްސް އިދިކޮޅު ފަރާތްތަކުގެ ބާރުގެ ދަށަށް ދިޔުމާއެކު، އެ ސިޓީގެ މަގުމަތީގައި ރައްޔިތުން ވަނީ އުފާފާޅުކޮށްފައެވެ.  އެގޮތުން "އަސަދު ހިގައްޖެ، ހޮމްސް މިނިވަންވެއްޖެ" އަދި ”ސީރިއާ، ބަޝާރުލް އަސަދު ވައްޓާލައިފި" ފަދަ ޝިއާރުތަކުން ރައްޔިތުން ވަނީ އަޑު އުފުލައިފައެވެ.

އަލް-ގައިދާއާ ގުޅުންހުރި ޖަމާއަތެއް ކަމަށްވާ ތަހްރީރު އަލް-ޝާމްގެ ލީޑަރު އަބޫ މުހައްމަދު އަލް-ގޮލާނީ ބުނެފައިވަނީ އިދިކޮޅު ފަރާތްތަކަށް މުޅި ގައުމުގެ ބާރު ހޯދުމަށް މަގުފަހިވެފައިވާ ކަމަށެވެ. އަދި "އަނިޔާވެރި ސަރުކާރުގެ ނިމުން ގާތްވެއްޖެ" ކަމަށްވެސް އޭނާ ބުނެފައިވެއެވެ.

ސީއެންއެންގެ ރިޕޯޓެއްގައި ބުނެފައިވާ ގޮތުގައި، އިދިކޮޅު ފަރާތްތަކުން ވަނީ ދިމިޝްގުގައި ހުރި ސަރުކާރުގެ މީޑިއާ ވަސީލަތްތަކުގެ ބާރު ހޯދާފައެވެ. އަދި އިދިކޮޅުން އަންނަނީ ދައުލަތުގެ މީޑިއާ މެދުވެރިކޮށް ސީރިއާގެ ރައްޔިތުންނާ މުޚާޠަބުކޮށް ފުރަތަމަ ބަޔާން ދޭން ތައްޔާރުވަމުންދާ ކަމަށްވެސް ބުނެފައިވެއެވެ.

ސީރިއާގެ ރައްޔިތުން އުފާފާޅުކުރަމުންދާއިރު، ސީރިއާގެ ބޮޑުވަޒީރު މުޙައްމަދު ޣާޒީ އަލް-ޖަލާލީ ވަނީ ވެރިކަމުގެ އިންތިޤާލީ މަރުޙަލާ ކުރިއަށް ގެންދިއުމަށް ތައްޔާރަށް ހުރި ކަމަށާއި، ސީރިއާގެ ރައްޔިތުން އިޚްތިޔާރުކުރާ ކޮންމެ ވެރިކަމަކާއެކު މަސައްކަތްކުރުމަށް ތައްޔާރަށް ހުރި ކަމަށް ބުނެފައެވެ.