ސީރިއާގެ ވެރިކަމުން ވައްޓާލެވުނު ރައީސް ބަޝާރުލްއަސަދު އާއި އޭނާގެ ޢާއިލާ ރަޝިޔާގެ ވެރިރަށް މޮސްކޯއަށް ގޮސް، އެ ޤައުމުން ހިމާޔަތް ހޯއްދަވާފައިވާ ކަމަށް ރަޝިޔާގެ ސަރުކާރުގެ މީޑިއާތަކުން ހާމަކޮށްފިއެވެ.

އިދިކޮޅު ފަރާތްތަކުން ސީރިއާގެ ވެރިރަށް ދަމާސްކަސް ހިފުމުން އަސަދުގެ ވެރިކަން ނިމުމަކަށް އައިސްފައިވާ ކަމަށް، ސީރިއާގެ އިދިކޮޅު ހަނގުރާމަވެރިން ވަނީ އިއުލާން ކޮށްފައެވެ.

އެއާއެކު އަސަދު އާއި އޭނާގެ އާއިލާ ސީރިޔާއިން ފިލާފައިވާއިރު، ބީބީސީގެ ރަޝިއަން ސަރވިސް އާއި އެހެން ބައެއް މަސްދަރުތަކުން ބުނާ ގޮތުގައި، އަލް-އަސަދު ގެންދެވުނީ ސީރިއާގެ ލަޒަކިއާގައި ހުރި ރަޝިއާގެ އެއަރ ބޭސްއިން ފުރި މަތިންދާބޯޓަކުންނެވެ. މި މަތިންދާބޯޓު ފުރީ އޭގެ ޓްރާންސްޕޮންޑަރުތައް ނިއްވާލައިގެންނެވެ.

އަދި މިހާރު ރަޝިއާގެ އޮފިޝަލުން ސީރިއާގެ ހަތިޔާރުއެޅި އިދިކޮޅު ފަރާތްތަކާ މުޢާމަލާތްކުރަން ފަށާފައިވާއިރު، އިދިކޮޅު ފަރާތްތަކުން ލަޒަކިއާ އާއި ޓަރޓޫސްގައި ހުރި ރަޝިއާގެ އަސްކަރީ މަރުކަޒުތަކާއި، ސީރިއާގައި ހުރި ރަޝިއާގެ ޑިޕްލޮމެޓިކް މިޝަންތަކުގެ ސަލާމަތްތެރިކަން ކަށަވަރުކޮށްދީފައިވާ ކަމަށް މީޑިއާ ރިޕޯޓްތައް ބުނެއެވެ. 

އަސަދުގެ ވެރިކަން ވެއްޓުމާ ގުޅިގެން ސީރިޔާގެ އެކިކަންކޮޅުތަކުގައި މުސްލިމުން އަންނަނީ އުފާ ފާޅުކުރަމުންނެވެ. އަދި އޭނާ ގައުމު ދޫކޮށް ފިލުމުން، ރިޔާސީ ގަނޑުވަރަށް ވަދެ އިދިކޮޅު ފަރާތްތަކުން ވަނީ އޭނާގެ ތަކެތި ލޫޓުވާފައެވެ.