ސީރިޔާގެ ރައީސް ބަޝާރު އަލް-އަސަދު ވައްޓާލި ހަނގުރާމަވެރިން, އެ ގައުމުގެ ވަގުތީ ބޮޑު ވަޒީރު ކަމަށް މުޙައްމަދު އަލް-ބަޝީރު އައްޔަން ކޮށްފިއެވެ. މި މަޤާމަށް އޭނާ އައްޔަން ކުރެވުނު ކަމަށް އަންގާރަ ދުވަހު ވަނީ އިއުލާންކޮށްފައެވެ.

އިދްލިބް ސަރަހައްދުގައި ހަޔަތު ތަހްރީރު އަލް-ޝާމްގެ ވެރިކަމުގެ ދަށުން ހިންގަމުން އައި ސަރުކާރުގެ އިސްވެރިޔާގެ ގޮތުގައި ހުރި އަލް-ބަޝީރު، 2025 ވަނަ އަހަރުގެ މާރިޗު 1 ވަނަ ދުވަހާ ހަމައަށް ސީރިޔާގެ ވަގުތީ ސަރުކާރު ހިންގާނެ ގޮތަށް ވަނީ ހަމަޖެހިފައެވެ.

މިކަމާއި ގުޅިގެން އަލް-ބަޝީރު ވިދާޅުވީ، އިއްޔެ ކުރީގެ ސަރުކާރުގެ މެންބަރުންނާއި އިދްލިބާއި އޭގެ ވަށައިގެންވާ ސަރަހައްދުތަކުގެ އިދާރީ ވެރިންނަށް ދަޢުވަތު ދީގެން ކެބިނެޓް ބައްދަލުވުމެއް ބޭއްވިފައިވާ ކަމަށެވެ. އެ އެ ބައްދަލުވުން ބާއްވާފައިވަނީ، ކުރިއަށް އޮތް ދެ މަސް ދުވަހުގެ ތެރޭގައި ސީރިޔާގެ ރައްޔިތުންނަށް ޚިދުމަތް ދިނުމަށް ބޭނުންވާ ޤާނޫނީ ނިޒާމެއް ޤާއިމުކުރެވެންދެން، ކުރަންޖެހޭ މަސައްކަތްތައް ފަސޭހަކުރުމަށްޓަކައި ކަމަށްވެސް ވިދާޅުވިއެވެ.

އަލް-ބަޝީރަކީ މީގެ ކުރިން އިދްލިބް ސަރަހައްދުގައި ހިންގި ސީރިއަން ސަލްވޭޝަން ގަވަރންމަންޓް (އެސްއެސްޖީ)ގެ އިސްވެރިޔާގެ ގޮތުގައި ހުރި ފަރާތެވެ. އަދި އޭނާއަކީ ދިމިޝްޤު ހިފި ހަޔަތު ތަހްރީރު އަލް-ޝާމް (އެޗްޓީއެސް) އާ ގާތް ގުޅުމެއް އޮތް ފަރާތެކެވެ.

12 ދުވަހުގެ ހަލުވި ހަނގުރާމައަކަށް ފަހު ދިމިޝްޤަށް ވަދެ، ދިގު މުއްދަތެއް ވަންދެން ވެރިކަން ކުރަމުން އައި އަލް-އަސަދުގެ ވެރިކަން ވައްޓާލައި، އަލް-އަސަދު ޢާއިލާގެ ނުފޫޒު ނިމުމަކަށް ގެނެސްފައިވަނީ އާދީއްތަ ދުވަހުއެވެ.