ދެކުނު ކޮރެއާގެ މުއާން ސިޓީގެ އެއަރޕޯޓެއްގައި މަތިންދާ ބޯޓެއް ވެއްޓި ގޮވުމުގެ ސަބަބުން މަރުވި މީހުންގެ އަދަދު 85 މައްޗަށް އަރާފައިވާ ކަމަށް އެ ގައުމުގެ ނެޝަނަލް ފަޔަރ އެޖެންސީން ބުނެފިއެވެ.

މި ހާދިސާ ހިނގީ އާދީއްތަ ދުވަހުގެ ހެނދުނު 9:03 ގައި (ގްރީންވިޗް މީން ޓައިމްގެ 00:03 ގައި) ތައިލެންޑުގެ ވެރިރަށް ބެންކޮކުން 175 ފަސިންޖަރުންނާއި 6 ކުރޫ މެންބަރުންނާއެކު އައި ޖެޖޫ އެއަރގެ ފްލައިޓެއް މުއާން އިންޓަނޭޝަނަލް އެއަރޕޯޓަށް ޖެއްސުމަށް މަސައްކަތް ކުރަމުންދަނިކޮށެވެ. މި އެއަރޕޯޓަކީ ދެކުނު ކޮރެއާގެ ވެރިރަށް ސޯލްއިން 289 ކިލޯމީޓަރު (179 މޭލު) ދުރުގައި އޮންނަ އެއަރޕޯޓެކެވެ.

ނެޝަނަލް ފަޔަރ އެޖެންސީން ކަށަވަރުކޮށްދީފައިވާ ގޮތުގައި މަރުވި 85 މީހުންގެ ތެރޭގައި 46 އަންހެނުންނާއި 39 ފިރިހެނުން ހިމެނެއެވެ. އަދި ހާދިސާގައި ދެ މީހަކު ސަލާމަތްވެފައިވާ ކަމަށާއި، އެ ދެ މީހުންނަކީވެސް ކުރޫ މެންބަރުން ކަމަށް އެޖެންސީން ބުނެފައިވެއެވެ. މަތިންދާ ބޯޓުގައި ރޯވި އަލިފާން ނިއްވާލެވިފައިވާ ކަމަށްވެސް އެޖެންސީން ބުނެފައިވެއެވެ.

ދެކުނު ކޮރެއާގެ ޔޮންހަޕް ނިއުސް އެޖެންސީން ފަޔަރ އެޖެންސީގެ އޮފިޝަލުންނަށް ހަވާލާދީ ބުނެފައިވާ ގޮތުގައި އިތުރު މީހަކު ދިރިހުރުމުގެ އުއްމީދު ކުޑައެވެ.

އަލްޖަޒީރާގެ ނޫސްވެރިޔާ ރޮބް މެކްބްރައިޑް ސޯލްއިން ރިޕޯޓުކުރި ގޮތުގައި މި ހާދިސާގައި ލޭންޑިންގ ގިއަރއަށް މައްސަލައެއް ދިމާވެފައިވާ ކަމަށް ބެލެވެއެވެ. އެގޮތުން މީޑިއާގައި އާންމުވެފައިވާ މަންޒަރުތަކުން ފެންނަނީ މަތިންދާ ބޯޓު ރަންވޭގައި ސްލައިޑްވަމުން ދިޔަ މަންޒަރެވެ. އެއަށްފަހު ބޮޑު ގޮވުމެއްގެ އަޑު އިވިފައިވާ ކަމަށް އޭނާ ބުންޏެވެ.

މަންޒަރު ދުށް މީހުން ބުނާ ގޮތުގައި އޭގެ ފަހުންވެސް ގިނަ އަދަދެއްގެ ގޮވުންތަކުގެ އަޑު އިވިފައިވެއެވެ.