ދެކުނު ކޮރެއާގެ ސަސްޕެންޑް ކުރެވިފައިވާ ރައީސް ޔޫން ސުކް-ޔޯލް ހައްޔަރުކުރުމަށް އެދި އެ ޤައުމުގެ ފަރާތްތަކުން ކޯޓަށް ހުށަހަޅައިފިއެވެ. މިފަދައިން އެދިފައި މިވަނީ އޭނާ ކުއްލިގޮތަކަށް އިއުލާނުކުރި މާޝަލް ލޯ އާއި ގުޅިގެންނެވެ.

ދެކުނު ކޮރެއާގެ ޖޮއިންޓް އިންވެސްޓިގޭޝަން ހެޑްކުއާޓަރސްއިން މިއަދު ބުނެފައިވަނީ ރައީސް ޔޫން ހައްޔަރުކުރުމަށް އެދި ކޯޓަށް ހުށަހަޅާފައިވަނީ ބާރުގެ ނަހަމަ ބޭނުންކުރުމުގެ ދައުވާތަކުގެ ދަށުންނެވެ. މި ހުށަހެޅުން ހުށަހަޅާފައިވަނީ ޔޫން ތިން ފަހަރެއްގެ މަތިން ސުވާލުކުރުމަށް ހާޒިރުވުމަށް އެންގުމުން އެކަމަށް އިޖާބަ ނުދިނުމާ ގުޅިގެންނެވެ.

ޔޫން ހައްޔަރުކުރުމަށް އެދި ހުށަހަޅާފައިވާ މި ހުށަހެޅުމާ ގުޅިގެން ކޯޓުން ނިންމުމެއް ނިންމާނެއެވެ. މިފަދަ ހުށަހެޅުމެއް ހުށަހެޅުމަކީ ދެކުނު ކޮރެއާގެ ތާރީޚުގައި ފުރަތަމަ ފަހަރަށް ހިނގާ ކަމެކެވެ.

ރައީސެއްގެ ހައިސިއްޔަތުން ޔޫންއަށް ގިނަ ކުށްތަކަކުން ދައުވާކުރުމުން ރައްކާތެރިކަން ލިބިފައިވީ ނަމަވެސް، އިންސަރެކްޝަން އަދި ޣައްދާރުވުމުގެ މައްސަލަތަކުގައި އެފަދަ ރައްކާތެރިކަމެއް ނުލިބެއެވެ.

ޔޫންގެ ވަކީލު ޔުން ގަޕް-ގޫން ވަނީ ކޮރަޕްޝަން އިންވެސްޓިގޭޝަން އޮފީސް (ސީއައިއޯ) އިން މި މައްސަލައިގައި އަމަލުކުރަމުންދަނީ އެ އޮފީހުގެ އިޚްތިޞާޞްއިން ބޭރުން ކަމަށް ބުނެފައެވެ. އަދި މިކަމާ ގުޅިގެން ރަސްމީ ފިޔަވަޅުތަކެއް އަޅާނެ ކަމަށްވެސް ބުނެފައިވެއެވެ.

ޑިސެމްބަރ 3 ގައި ޔޫން ކުއްލިގޮތަކަށް މާޝަލް ލޯ އިއުލާނުކުރުމާ ގުޅިގެން ދެކުނު ކޮރެއާ ވަނީ އެ ޤައުމުގެ ތާރީޚުގައި އެންމެ ބޮޑު ސިޔާސީ ހަލަބޮލިކަމަކާ ކުރިމަތިލާންޖެހިފައެވެ. ޑިސެމްބަރ 14 ގައި ނެޝަނަލް އެސެމްބްލީން 204-85 ވޯޓަކުން ޔޫން އިމްޕީޗްކުރުމަށް ނިންމުމާ ގުޅިގެން އޭނާ ވަނީ މަޤާމުން ސަސްޕެންޑްކުރެވިފައެވެ.

ސިޔާސީ މައިދާނަށް ނުކުތުމުގެ ކުރިން ޤައުމުގެ އެންމެ މަތީ ޕްރޮސެކިއުޓަރެއްގެ މަޤާމު ފުރުއްވާފައިވާ ޔޫންއާ ދެކޮޅަށް މިހާރު ކުރިމަތިވެފައިވާ އިންސަރެކްޝަންގެ ދައުވާއަކީ އުމުރު ދުވަހުގެ ޖަލު ނުވަތަ މަރުގެ އަދަބު ލިބިދާނެ ކުށެކެވެ.