ދުނިޔޭގެ އެންމެ މަޝްހޫރު ޓެކްނޮލޮޖީ ބިލިއަނަރުންގެ ތެރެއިން އެކަކު ކަމުގައިވާ އެލޮން މަސްކް، އޭނާގެ އެކްސް (ކުރީގެ ޓްވިޓަރ) ޕްރޮފައިލްގެ ނަން "ކެކިއަސް މެކްސިމަސް" އަށް ބަދަލުކޮށްފިއެވެ. މީގެ އިތުރުން އޭނާގެ ޕްރޮފައިލް ފޮޓޯވެސް މަޝްހޫރު 'ޕެޕޭ ދަ ފްރޮގް' މީމްގެ ފޮޓޯއަކަށް ބަދަލުކޮށްފައިވެއެވެ.

މި ބަދަލާއެކު މަސްކްގެ އައު ޕްރޮފައިލް ފޮޓޯގައި ވަނީ ރަން ކުލައިގެ އާމަރެއް ލައިގެން، ވީޑިއޯ ގޭމް ކޮންޓްރޯލަރެއް ހިފަހައްޓައިގެން ހުރި 'ޕެޕޭ ދަ ފްރޮގް' އެކެވެ. މި ފޮޓޯއަކީ އެތައް އަހަރެއް ވަންދެން އިންޓަނެޓްގައި މަޝްހޫރުވެފައިވާ، މީމްއެކެވެ.

މަސްކުގެ ޕްރޮފައިލް ފޮޓޯ އަކަށް ލާފައިވާ ފޮޓޯ

'ކެކިއަސް މެކްސިމަސް' އަކީ އީތަރިއަމް އަދި ސޮލާނާ ފަދަ ގިނަ ބްލޮކްޗެއިން ޕްލެޓްފޯމްތަކުގައި ބޭނުންކުރެވޭ މީމް-އިންސްޕަޔަރޑް ކްރިޕްޓޯކަރަންސީ ޓޯކަނެކެވެ. މިއީ ފަހަކަށް އައިސް ކްރިޕްޓޯކަރަންސީ މާކެޓްގައި ފާހަގަކޮށްލެވޭ ޓޯކަނަކަށްވެ، އިންވެސްޓަރުންނާއި ޝައުގުވެރިވާ ފަރާތްތަކުގެ ސަމާލުކަން ލިބިފައިވާ ޓޯކަނެކެވެ.

ޑިސެމްބަރ 27 ގެ ނިޔަލަށް ކެކިއަސްގެ އަގު ހުރީ 0.005667 ޑޮލަރުގައެވެ. މިއީ 24 ގަޑިއިރުގެ ތެރޭގައި 497.56 އިންސައްތައިގެ ކުރިއެރުމެކެވެ.

މަސްކްގެ ޕްރޮފައިލް ނަން ބަދަލުކުރުމާއި ކްރިޕްޓޯކަރަންސީއާ ހުރި ގުޅުން އަދި ސާފެއް ނޫނެވެ. ނަމަވެސް މަސްކަކީ ކްރިޕްޓޯކަރަންސީއަށް ޝައުގުވެރިވާ މީހެކެވެ.

މަސްކްގެ އެކްސް ޕްރޮފައިލްގެ ނަން ބަދަލުކުރި މިއީ ފުރަތަމަ ފަހަރެއް ނޫނެވެ. އެގޮތުން 2023 ވަނަ އަހަރުގެ ޖެނުއަރީ 26 ވަނަ ދުވަހު އޭނާ ބުނެފައިވަނީ "އަހަރެންގެ ނަން މިސްޓަރ ޓްވީޓަށް ބަދަލުކޮށްފިން، މިހާރު ޓްވިޓަރުން އަނބުރާ ބަދަލުކުރިޔަ ނުދޭ" ކަމަށެވެ.