ހުޅުމާލޭ ބާޒާރުގައި ކުކުޅު ބިހުގެ އަގު އުފުލި، ބިސް ލިބުން ދަތިވެއްޖެއެވެ.

ހުޅުމާލޭގައި މިވަގުތު ކުކުޅު ބިހުގެ އަގަު ހުރިގޮތަށް ބަލާއިރު، އެންމެ އަގުހެޔޮކޮށްވެސް ބިސް ލިބެންހުރީ 2 ރުފިޔާއަށެވެ. ހުޅުމާލެ ފޭސް2 ދޭއްގެ ބައެއް ފިހާރަތަކުގައި ބިހެއް 2.50 ރުފިޔާއަށްވެސް ވިއްކައެވެ. ފިހާރަތަކުން ބިސް ލިބެން ހުއްޓަސް، ބައެއް ފިހާރަތަކުގައި ބިސް ވިއްކަނީ ލިމިޓްކޮށެވެ. ހުޅުމާލޭ ބާޒާރުގައި ކުކުޅު ބިހެއްގެ އަގު 2 ރުފިޔާއަށް އުފުލިފައިވާއިރު، އާއްމު ގޮތެއްގައި ބާޒާރުގައި ކުކުޅު ބިހެއް 1.75 ރުފިޔާއަށް ލިބެން ހުރެއެވެ.

މިކަމާ ގުޅޭގޮތުން ހުޅުމާލޭގެ ބާޒާރަށް ގިނަ އަދަދަކަށް ބިސް އެތެރެކުރާ މުޑުވާލި ފިހާރައިން ބުނީ، މިވަގުތު އެތަނުންވެސް ބިސް ހުރީ ހުސްވެފައިކަމަށާއި، ހަވީރުގެ ވަގުތެއްގައި ބިސް ލިބޭނޭކަމަށެވެ. ވޮއިސްއާ މައުލޫމާތު ހިއްސާކުރި ބައެއް ވިޔަފާރިވެރިން ބުނީ، ބިސް ކަހަލަ ބައެއް ތަކެތި ލިބުން ދަތިވެގެން އުޅެނީ މޫސުން ގޯސްވެގެން ދަތުރުފަތުރުކުރުމުގައި ދަތިތަކެއް ހުރުމުންކަމަށެވެ. މީގެ އިތުރުން ބޭރުފައިސާ ލިބުން ދަތިވުމަކީވެސް މި ބާވަތުގެ ތަކެތީގެ އަގުތައް އުފުލެން ދިމާވި ސަބަބެއްކަމަށް ވިޔަފާރިވެރިން ބުންޏެވެ.

ކުކުޅު ބިހުގެ އިތުރުން ހުޅުމާލޭ ބާޒާރުގައި ފިޔާ އަދި އަލުވީގެ އަގުތައްވެސް ވަނީ އުފުލިފައެވެ. މީގެ ކުރިން 16 ވަރަކަށް ރުފިޔާއަށް ފިޔާ ކިލޯއެއް ލިބުނު ނަމަވެސް މިހާރު ފިޔާކިލޯއެއް އެންމެ ހެޔޮވެގެންވެސް ހުރީ 20 ރުފިޔާއަށެވެ. އަލުވި ކިލޯއެއްގެ އަގު މިހާރުހުރީ 22 ރުފިޔާ އަށެވެ.

ބާޒާރުގައި ކުކުޅު ބިހާއި، އަލުވި އަދި ފިޔާގެ އަގު އުފުލިފައިވާއިރު، ކުރިއަށް އޮތް ރަމަޟާންމަހު މި ތަކެތީގެ އަގުތައް އުފުލުނަ ނުދިނުމަށްޓަކައި އެޅިދާނެ ފިޔަވަޅުތަކާ ގުޅޭގޮތުން އިކޮނޮމިކް މިނިސްޓްރީން ވަނީ މިދިޔަ ޑިސެމްބަރުމަހުގެ ތެރޭގައި އެސްޓީއޯއާއެކު މަޝްވަރާތައް ކުރިއަށްގެންގޮސްފައެވެ. މިގޮތުން އެސްޓީއޯއިން ވަނީ ރަމަޟާންމަހަށް ދިވެހިން އާއްމުކޮށް ބޭނުންކުރާ ތަކެތީގެ އަގުތައް ބޮޑުވިޔަ ނުދިނުމަށްޓަކައި މިހާރުން ފެށިގެން ފިޔަވަޅުތައް އަޅަން ފަށާފައިކަމަށް އިކޮނޮމިކް މިނިސްޓްރީން ބުނެއެވެ.