މިދިޔަ އަހަރުގެ އޮގަސްޓް 29ގައި އަންހެނަކު ރަހީނުކުރި މައްސަލައިގައި ހައްޔަރުކޮށްފައި ހުއްޓައި ޖަލު ގޮޅީގައި ދަންޖެހިގެން މަރުވި އާދަމް އަތުހަރުގެ މަރުގެ މައްސަލައިގައި ދެ ފުލުހެއްގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފިއެވެ.
ދޫނިދޫ ކަސްޓޯޑިއަލްގައި ހުއްޓާ އަމިއްލައަށް މަރުވާން މަސައްކަތްކުރުމާ ގުޅިގެން ހާލު ދެރަވެ، އައިޖީއެމްއެޗުގެ އައިސީޔޫގައި ފަރުވާ ދެމުންދަނިކޮށް އަތުހަރު މަރުވެފައިވާއިރު، އޭނާގެ މަރާއި ގުޅިގެން ފުލުހުންނަށް ބޮޑެތި ފާޑުކިޔުންތައް އަމާޒުވިއެވެ.
އެ މައްސަލަ ހިއުމަން ރައިޓްސް ކޮމިޝަން (އެޗްއާރުސީއެމް) އިންނާއި ނެޝަނަލް އިންޓެގްރިޓީ ކޮމިޝަން (އެންއައިސީ) ވަނީ ތަހުގީގު ކޮށްފައެވެ.
އެކަމާއި ގުޅިގެން އެޗްއާރސީއެމުން މިއަދު "ވޮއިސް"އަށް މައުލޫމާތު ދެމުން ބުނީ، އެ މައްސަލައިގައި ޝާމިލުވާ ދެ އޮފިސަރެއްގެ މައްޗަށް ދައުވާ ކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހަށް ފޮނުވާފައިވާނެ ކަމަށެވެ.
ނަމަވެސް އެކަމާއިގުޅެ އިތުރު އެއްވެސް ތަފުސީލެއް ނުދެއެވެ.
މިދިޔަ އަހަރުގެ އޮގަސްޓް މަހުގެ ފަހުކޮޅު، ފުލުހުން އަތުހަރު ހައްޔަރު ކުރީ، އޭނާގެ ލޯބިވެރިޔާކަމަށް ބުނާ އަންހެން މީހާއަށް ވަޅިން ބިރުދެއްކުމަށްފަހު ސައިކަލުގައި އެ އަންހެންމީހާ ގޮވައިގެން ފިލަން މަސައްކަތްކުރަމުން ދަނިކޮށެވެ.
ހައްޔަރު ކުރަން އުޅުމުގެ ތެރޭގައި އަތުހަރުގެ ބޮލަށް އަނިޔާވެފައިވާއިރު، އެ އަނިޔާތަކަށް ހޮސަޕިޓަލުގައި ފަރުވާ ދިނުމަށްފަހު ދޫނިދޫ ޖަލަށް ވަނީ ގެންގޮސްފައެވެ. އަތުހަރު ދަންޖެހުނީ އެތަނުގައި ހުރެއެވެ. އަދި އޭނާ މަރުވީ އަޖީއެމްއެޗްގެ އައިސީޔޫގައި ފަރުވާ ދެމުންދަނިކޮށް މިދިޔަ އަހަރުގެ ސެޕްޓެމްބަރ މަހުގެ 2 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
