ކ. ކާށިދޫގެ އެމްޖީ ސްޕޯޓްސް ކްލަބާއި ފިއޮންޓީ ސްޕޯޓްސް އެކަޑަމީ ގުޅިގެން ކާށިދޫގައި ކުރިއަށް ގެންދާ އެމްޖީ ސްޕޯޓްސް އެކަޑަމީގެ އަހަރީ ދުވަސް ފާހަގަކުރުމުގެ ގޮތުން ޚާއްސަ ހަފްލާއެއް ބާއްވައިފިއެވެ.
ހޯމަ ދުވަހު ހަވީރު ކާށިދޫ ފުޓްބޯޅަ ދަނޑުގައި ބޭއްވި މިހަފްލާ ޝަރަފްވެރިކޮށްދެއްވީ އެމްޖީ ސްޕޯޓްސް އެކަޑަމީގެ ހެޑްކޯޗު އަދި ޓެކްނިކަލް ޑައިރެކްޓަރ މުހައްމަދު ނިޒާމް އެވެ. އަދި މިހަފްލާގައި އެކެޑަމީގެ ކޯޗުންނާއި ދަރިވަރުން ބައިވެރިވެފައިވެއެވެ.
މިހަފްލާގައި އެކަޑަމީގެ ކޯޗުން މިދިޔަ އެއްއަހަރު ކުރެއްވި ބުރަ މަސައްކަތުގެ އަގުވަޒަންކޮށް އެފަރާތްތަކަށް ސެޓްފިކެޓް ދީފައިވާއިރު، އެކަޑަމީގެ ދަރިވަރުންގެ މެދުގައި ގުރުއަތުން ހޮވުނު 12 ދަރިވަރަކަށް (އެއްއަހަރުގެ މުއްދަތަށް) ކޮންމެ މަހަކުވެސް ކޮންމެ ވެސް އެއްކުއްޖެއްގެ މަހު ފީ ހިލޭ ލިބޭ ވައުޗާއެއް ވަނީ ހަވާލުކޮށްފައެވެ.
މިހަފްލާގައި އެމްޖީ ސްޕޯޓްސް އެކަޑަމީގެ ސްޕޯޓްސް ފިއެސްޓާ 2025 މިއަހަރުގެ ފެބްރުއަރީ މަހު ބޭއްވުމަށް ނިންމިކަން އިއުލާންކުރުމުގެ އިތުރުން އަންނަ އަހަރުގެ އަހަރީ ފަހްލާގައި އެކަޑަމީގެ ކޮންމެ އުމުރުފުރާއަކުން، އެންމެ ރަނގަޅު ތިން ދަރިވަރުން ހޮވުމަށް ނިންމާފައިވާކަށް ވަނީ އިއުލާންކޮށްފައެވެ.
މީގެ އިތުރުން މިހަފްލާ އަހަރީ ދުވަހުގެ މުނާސަބަތުގައި ކޭކެއް ފެޅުމުގެ އިތުރުން އެކަޑަމީގެ ހުރިހާ ދަތިވަރުންނަށް ޚާއްސަ ސަޔެއް ތައްޔާރުކުރެވިފައިވެއެވެ.
Advertisement
This content is created and paid for by advertisers and does not involve Voice Journalists
