މި މަހުގެ 31 ވަނަ ދުވަހު އެމްޑީޕީގެ ފަރާތުން ބާއްވާ ހިނގާލުމާއި، މަގުމަތީ ހަރަކާތްތަކާއި ބެހޭ ގޮތުން އެޕާޓީގެ ރައީސް އަބްދުﷲ ޝާހިދު މަޝްވަރާ ބައްދަލުވުންތަކެއް ބާއްވަން ފައްޓަވައިފިއެވެ.

ޗާންދަނީ މަގުގައި ހުންނަ އެމްޑީޕީގެ ހަރުގޭގައި ކުރިއަށްދާ މި ބައްދަލުވުންތަކުގައި މިހާތަނަށް މާލޭ ދާއިރާއާއި، އެޕާޓީގެ އެކި ކޮމިޓީތަކުގެ މުޤައްރިރުން އަދި ނައިބު މުޤައްރިރުންގެ އިތުރުން ހއ އަދި ހދ އަތޮޅުގެ ދާއިރާތަކުގެ އިސްވެރިންނާއެކު ބައްދަލުކޮށްފައިވާކަމަށް މައުލޫމާތު ލިބެއެވެ. މި ބައްދަލުވުންތަކުގައި މަޝްވަރާކުރެވެނީ އެ ދުވަހުގެ ހަރަކާތްތަކާއި، އެހަރަކާތްތަކުގައި ދާއިރާތަކުގެ މެމްބަރުން ބައިވެރިކުރުމުގެ އިންތިޒާމްތަކާއި ބެހޭ ގޮތުންކަމަށް ބައްދަލުވުމެއްގައި ބައިވެރިވި ބޭފުޅަކު މައުލޫމާތު ދެއްވިއެވެ.

އެމްޑީޕީގެ ސަރުކާރު ނިމި، ރައީސް ޑރ މުއިއްޒުގެ ސަރުކާރު ފެށުނު އެންމެ އަހަރެއްވީތަނާ އެމްޑީޕީއިން މަގުމަތީ ހަރަކާތްތަކަށް ނިކުންނަން ނިންމީ "ގާނޫނު އަސާސީގެ ދިފާއުގައި" ނިކުންނަން ވެއްޖެކަމަށް އެޕާޓީގެ ގައުމީ މަޖިލީހުން ފާސްކުރުމާއި ގުޅިގެންނެވެ.

Advertisement