ކުރިއަށްއޮތް ދެތިން ދުވަހުގެ ތެރޭގައި މޫސުން ގޯސްވެދާނެތީވެ، މާލެސިޓީ ކައުންސިލުން އެކަމަށް ތައްޔާރުވާން ފަށައިފިއެވެ.
މޫސުމާބެހޭ ޤައުމީ އިދާރާއިން ވަނީ ރާއްޖޭގެ ހުޅަނގު ދެކުނު ބޭއޮފް ބެންގާލުގައި އުފެދިފައިވާ ކޮޅިގަނޑު ހުޅަނގަށްޖެހި ރާއްޖޭގެ ސަރަހައްދުގައި ބޯވިއްސާރަވިލާ އުފެދި މާދަމައިން ފެށިގެން އަންނަ ހަފްތާގެ އާދިއްތަ ދުވަހާ ހަމަޔަށް މޫސުން ގޯސްވެދާނެކަމަށް ލަފާކުރެވޭތީވެ އެކަމަށް ސަމާލުވުމަށް އިލްތިމާސްކޮށްފައެވެ.
މިކަމާ ގުޅިގެން މާލެސިޓީ ކައުންސިލުން ވަނީ، ކުރިއަށް އޮތް ދެތިން ދުވަހުގެ ތެރޭގައި މޫސުން ގޯސްވެ، ވިއްސާރަވެދާނެ ކަމަށް މޫސުމާބެހޭ ފަރާތްތަކުން އަންދާޒާކޮށްފައިވާތީ، ފެންބޮޑުވެދާނެ ހާލަތަކަށް ތައްޔާރުވުމުގެ ގޮތުން ވެލި ބަސްތާ ތައްޔާރުކޮށް ދުރާލާ ވެލި ބަސްތާ ޖެހުމުގެ މަސައްކަތް ކުރިއަށްދާކަމަށް ބުނެފައެވެ. މީގެ އިތުރުން ސިޓީ ކައުންސިލުން ވަނީ ހާއްސަ ކޮމިޓީއެއްވެސް އުފައްދާފައެވެ. މި އުފެއްދި ކާރިސާ ކޮމިޓީގެ ބޭނުމަކީ މޫސުން ގޯސްވުމާ ގުޅިގެން ލިބޭ ގެއްލުންތައް ވިލަރެސްކުރުންކަމަށް ސިޓީކައުންސިލުން ފާހަގަކުރެއެވެ
ކުރިއަށް އޮތް ދުވަސްތަކުގައި މޫސުން ކުރިއަށްލަފާކުރާ ގޮތާ ބެހޭގޮތުން މެޓް އޮފީހުން ބުނެފައިވަނީ، މާދަމައިން ފެށިގެން ޖެނުއަރީމަހުގެ 18 ވަނަ ދުވަހުގެ ނިޔަލަށް ރާއްޖޭގެ ބޮޑުބަޔަކަށް ގުގުރުމާއެކު ބޯކޮށް ވާރޭވެހި، ވަޔާއި ކަނޑުތައް ގަދަވާނޭކަމަށެވެ. މީގެ އިތުރުން ބައެއް އަތޮޅުތަކަށް އުދަ އެރުމުގެ ފުރުސަތު އޮތްކަމަށްވެސް މޫސުމާބެހޭ އިދާރާއިން ލަފާކުރެއެވެ.
މިކަމާ ގުޅޭގޮތުން ޑިޒާސްޓާ އޮފީހުން ބުނީ، މޫސުން ގޯސްވެ ލިބިދާނެ ގެއްލުންތަކުން ރައްކާތެރިވުމަށް ދުރާލާ ތައްޔާރުވުމަށް އިލްތިމާސްކޮށްފައެވެ.
އެންޑީއެމްއޭއިން ފާހަގަ ކޮށްފައިވާ ބައެއް ރައްކާތެރިކަމުގެ ފިޔަވަޅުތަކަކީ:
- ފެންބޮޑުވެދާނެ ކަމަށް ތައްޔާރުވުން
- ގެއަށް ފެން ނުވަންނާނެހެން ވެލި ބަސްތާ ފަދަ ތަކެތި ޖެހުން
- ފެން ބޮޑުވެއްޖެ ހިނދެއްގައި ގެއްލުން ވާނެ ފަދަ މުދާ އުސް ތަންތަނަށް ބަދަލުކުރުން
- ގަދަ ވައިގެ ސަބަބުން އެއްލައިލަފާނެ ތަކެތި ބަނދެ ރައްކަކުރުން
- ފުރާޅު އެއްލައިލަފާނެ ކަމަށް ލަފާކުރެވޭނަމަ، ކުރިޔާލައި ފުރާޅު ހައްޔަރުކުރުން
- ކަރަންޓުން ބޭނުން ކުރާ ތަކެތި، ބޭނުން ނުކުރާ ވަގުތު ތަކުގައި ނިއްވާލާފައި ބެހެއްޓުން
- ކަނޑުދަތުރުފަތުރު ކުރާނަމަ މޫސުމަށް ބަލައިގެން ދަތުރުކުރުމަށް ސަމާލުވުން
- ދަތުރަކަށް ފުރުމުގެ ކުރިން، ސަލާމަތީ ކަންކަން ކަށަވަރުކުރުމާއި މުވާސަލާތީ ނިޒާމުގެ ފުރިހަމަކަން ޔަޤީން ކުރުން
- ކާޑުގެ ބާވަތްތަކާއި ޒަރޫރީ ތަކެއްޗަށް ދަތިނުވާނެހެން ދުރާލާ ކަންކަން އިންތިޒާމުކުރުން.
- ހާއްސަކޮށް މާލޭގައި ފެންބޮޑުވެފައިވާ ހާލަތްތަކުގައި ބަރު އުޅަނދު ނުދުއްވުން
ކުރިއަށްމިއޮތް ދުވަސްތަކުގެ ތެރޭގައި މޫސުން ގޯސްވެދާނޭކަމަށް ލަފާކޮށްފައިވާއިރު، މިދިޔަ ދުވަސްތަކުގައި މޫސުން ގޯސްވެ ބޯކޮށް ވާރޭވެހުމުގެ ސަބަބުން މާލޭގެ ބައެއް ގެތަކަށާއި އެތަންތަނުގައި ދިރިއުޅެމުންދިޔަ އާއިލާތަކަށް އެކިވަރުގެ ގެއްލުންތައް ވަނީ ލިބިފައެވެ.
Advertisement
This content is created and paid for by advertisers and does not involve Voice Journalists
