ރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިރޭ އެސްޓޯނިއާއަށް ފުރާވަޑައިގަންނަވައިފިއެވެ.

ރައީސް ޑރ.މުއިއްޒުގެ މި ދަތުރުފުޅަކީ، އެސްޓޯނިއާގެ ރައީސް ޑރ. އަލާރް ކަރިސްގެ ދައުވަތަކަށް ކުރައްވާ ދަތުރުފުޅެކެވެ. ރައީސްގެ މި ދަތުރުފުޅަކީ ރާއްޖޭގެ ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅަކު އެސްޓޯނިއާއަށް ކުރައްވާ ފުރަތަމަ ރަސްމީ ޒިޔާރަތެވެ. މި ދަތުރުފުޅާ ގުޅޭގޮތުން ރައީސުލްޖުމްހޫރިއްޔާގެ އޮފީހުން ބުނެފައިވަނީ، މި ދަތުރުފުޅުގައި ދެ ޤައުމުގެ ދެމެދުގައި އޮންނަ ގުޅުން ބަދަހިކުރުމާއި، އެކުގައި މަސައްކަތްކުރުމުގެ ފުރުޞަތުތައް ހޯދުމާއި ގުޅޭގޮތުން މަޝްވަރާކުރެވޭނެކަމަށެވެ. މި މަޝްވަރާތަކުގައި ޑިޖިޓަލް، ސައިބަރ އަދި އީ-ގަވަރނަންސްގެ ދާއިރާތަކުންނާއި، މޫސުމާއި ތިމާވެށީގެ މައްސަލަތަކުގައި އަދި ސައިންސާއި ތަޢުލީމުގެ ދާއިރާއިން ދެގައުމުން އެއްބާރުލުން ދެވިދާނެ ދާއިރާތައް ހިމެނެއެެވެ.

މި ދަތުރުފުޅުގައި ރައީސް ޑރ.މުޢިއްޒު، އެސްޓޯނިއާގެ ދެވަނައަށް އެންމެ ބޮޑު ސިޓީ، ޓާރޓޫ ސިޓީއަށްވެސް ޒިޔާރަތްކުރެއްވުމަށް ހަމަޖެހިފައިވާއިރު، މި ސިޓީގައި ހުންނަ ޓާރޓޫ ޔުނިވަރސިޓީއަކީ ސައިންޓިފިކް ދުނިޔޭގައި ފާހަގަކޮށްލެވޭ ޔުނިވާސިޓީއެކެވެ. އެގޮތުން އެމަނިކުފާނު މި ޔުނިވަރސިޓީއަށާއި، އެތަނުގެ ރިސާޗް އެންޑް ޑިވެލޮޕްމެންޓާއި، އެސްޓޯނިއާގެ ޖީނޯމް ޑޭޓާބޭސް ސެންޓަރަށާއި، ގްރީންއެނަރޖީ ޑޭޓާ ސެންޓަރަށް ޒިޔާރަތްކުރައްވާނެއެވެ.

ރައީސް އޮފީހުން މައުލޫމާތުދޭ ގޮތުގައި، މި ބައްދަލުވުންތަކާއި މަޝްވަރާތަކުގައި އެސްޓޯނިއާގެ ޓެކްނޮލޮޖީގެ ކުރިއެރުންތަކަށް އަލިއަޅުވާލުމަށް ހަމަޖެހިފައިވާއިރު، ރައީސް ޑރ.މުޢިއްޒުގެ މި ދަތުރުފުޅުގައި އެސްޓޯނިއާގެ ރައީސްގެ ޑިޖިޓަލް އެޑްވައިޒަރީ ކައުންސިލުން އިންތިޒާމުކުރާ ބައްދަލުވުމެއްގައިވެސް ބައިވެރިވެވަޑައިގަންނަވާނެއެވެ. މި ބައްދަލުވުމުން ދެ ޤައުމުގެ ދެމެދުގައި އިތުރަށް އެއްބާރުލުން ދެވިދާނެ ދާއިރާތައް ބަލައި ދިރާސާކުރުމުގެ ފުރުޞަތު ލިބިގެންދާނެކަމަށް ރައީސް އޮފީހުން ބުނެއެވެ.

މި ދަތުރުފުޅުގައި ރައީސް ޑރ.މުޢިއްޒުގެ އަރިހުގައި ޚާރިޖީ ވަޒީރު ޑރ. ޢަބްދުﷲ ޚަލީލާއި، ހޯމްލޭންޑް ސެކިއުރިޓީ އެންޑް ޓެކްނޮލޮޖީ ވަޒީރު ޢަލީ އިޙްސާނާއި، ސަރުކާރުގެ އިސް ބޭފުޅުންގެ ވަފުދަކާއިއެކު، ރާއްޖޭގެ ޓެކްނޮލޮޖީ ދާއިރާގެ އިސް ފަރާތްތަކުގެ މައްޗަށް އެކުލެވޭ އެކުލެވޭ އަމިއްލަ ވަފުދެއްވެސް ވަޑައިގަންނަވާއިރު، މި ވަފުދުން އެސްޓޯނިއާގެ ޑިޖިޓަލް ދާއިރާގައި މަސައްކަތްކުރާ ކުންފުނިތަކާއި އިންސްޓިޓިއުޓްތަކާ ބައްދަލުކުރައްވާނެއެވެ.