މިއަހަރުގެ މިހާތަނަށް ރާއްޖެއަށް ބައިލައްކަ އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާއި ބެހޭ ވުޒާރާއިން ބުނެފިއެވެ.

ފަތުރުވެރިކަމާއި ބެހޭ ވުޒާރާއިން ހާމަކުރާ ފަތުރުވެރިކަމުގެ ޑެއިލީ އަޕްޑޭޓްސް އިން ދައްކާގޮތުގައި މިމަހުގެ 11 ވަނަ ދުވަހާއި ހަމައަށް ރާއްޖެއަށް ވަނީ 69,553 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި އައި 63,141 ފަތުރުވެރިންނާއި އަޅާ ބަލާއިރު 10.2 އިންސައްތައިގެ ކުރިއެރުމެކެވެ.

މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ މިދިޔަ އަހަރުގެ ފަތުރުވެރިކަމުގެ މާކެޓްގައި ދެވަނައިގައި އޮތް ރަޝިއާއިންނެވެ. މިގޮތުން ރަޝިއާއިން 11,367 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިދިޔަ އަހަރު އެއްވަނައިގައި އޮތް ޗައިނާއިން 4,092 ފަތުރުވެރިންނާއިއެކު މިހާތަނަށް އޮތީ މާކެޓްގެ 5 ވަނައިގައެވެ.

Advertisement

މީގެ އިތުރުންވެސް އަހަރުގެ މިހާތަނަށް ފަތުރުވެރިކަމުގެ މާކެޓްގެ 2 ވަނަގައި 8,499 ފަތުރުވެރިންނާއިއެކު އިޓަލީ އޮތް އިރު 3 ވަނައިގައި އިނގިރޭސިވިލާތް އޮތީ 5,537 ފަތުރުވެރިންނާއިއެކުއެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ މިމަހުގެ 11 ވަނަ ދުވަހުއެވެ. މިގޮތުން އެދުވަހު ރާއްޖެއަށް ވަނީ 8,090 ފަތުރުވެރިން ޒިޔާރަތްކޮށްފައެވެ.

މިދިޔަ އަހަރު ރާއްޖެއަށް 2 މިލިއަން ފަތުރުވެރިން އައިސްފައިވާއިރު، މިއަހަރު އެއަދަދު 2.2 މިލިއަނަށް އިތުރުކުރުމަކީ ސަރުކާރުގެ އަމާޒެއްކަން ފާހަގަކޮށްލަން ޖެހެއެވެ.