ރާއްޖޭގެ މަސްވެރިކަން ރަނގަޅުވެ، މަސްކިރާ މިންވަރު އިތުރުވާން ފަށައިފި ކަމަށް ސަރުކާރުގެ މަސް ކުންފުނި މިފްކޯއިން ބުނެފިއެވެ.

މި ދޭތެރެއިން މިފްކޯއިން މަސް ގަންނަ އަދަދު ވަރަށް ބޮޑަށް ދަށްވެގެން ދިޔަ ކަން ތަފާސް ހިސާބުތަކުން ދައްކައެވެ. އެގޮތުން މިދިޔަ ޑިސެންބަރު 23ގައި މިފްކޯއިން މަސްވެރިންނަށް ފައިސާ ދޫކޮށްފައިވަނީ 55 މެޓްރިކް ޓަނުގެ މަހަށް ކަމަށް ވާއިރު، އެމަހުގެ 24ވަނަ ދުވަހު ފައިސާ ދޫކޮށްފައިވަނީ 82 މެޓްރިކު ޓަނުގެ މަހަށެވެ.

އެހެން ނަމަވެސް، މިފްކޯގެ ތަފާސްހިސާބުން ދައްކާ ގޮތުގައި މިދިޔަ 7 ދުވަހު، އެވަރޭޖްކޮށް ކޮންމެ ދުވަހަކު 272 މެޓްރިކް ޓަނުގެ މަސް ކިރުވާފައިވެއެވެ. 

އެގޮތުން، ވޭތުވެދިޔަ 48 ގަޑިއިރު ތެރޭގައި 321 މެޓްރިކު ޓަނުގެ މަސް ވަނީ ގަނެފައެވެ. އެއީ، ފެލިވަރު ފިޝަރީޒް ކޮމްޕްލެކްސަށް 50.70 މެޓްރިކް ޓަން، ކޫއްޑޫ ފިޝަރީޒް ކޮމްޕްލެކްސަށް 221.12 މެޓްރިކް ޓަން އަދި، އައްޑޫ ފިޝަރީޒް ކޮމްޕެލެކްސަށް ކިރި 48.71 މެޓްރިކް ޓަނުގެ މަހެވެ.

މީގެ އިތުރުން ނިމުނު ހަފްތާގެ ބުރާސްފަތި ދުވަހު މިފްކޯއަށް ވަނީ 492 މެޓްރިކު ޓަނުގެ މަސް ގަނެފައެވެ. އެއީ ޖުމްލަ 110 އޮޑިއަކުން އެ ދުވަހު މިފްކޯއަށް ކިރި މަހެވެ. އެއަށްވާ ފައިސާގެ ގޮތުގައި 5.7 މިލިއަން ރުފިޔާ މިފްކޯއިން އެ ދުވަހު ދޫކޮށްފައިވެއެވެ.