މިމަހު 31 ވަނަ ދުވަހު އެމްޑީޕީން ބޭއްވުމަށް ހަމަޖެހިފައިވާ މަގުމަތީ ހަރަކާތަކީ، ސުލްހަވެރި ހަރަކާތެއް ކަމަށް އެ ޕާޓީގެ ތަރުޖަމާނު އަނަސް އަބްދުއްސައްތާރު ވިދާޅުވެއްޖެއެވެ.
މި މަހުގެ 31ގައި އެމްޑީޕީން އެއްވުމެއް ބާއްވަން ނިންމާފައި ވަނިކޮށް، ދާދިފަހުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ހުވަދު އަތޮޅަަށް ކުރެއްވި ދަތުރުފުޅުގެ ތެރެއިން އެމަނިކުފާނު ވަނީ، ގައުމުގެ މަސްލަހަތު ނަގާލުމަށް ފުރުސަތު ނުދެއްވާނެ ކަމަށް ވިދާޅުވެފައެވެ.
އެމަނިކުފާނުގެ އެ ވާހަކަފުޅަކީ އެމްޑީޕީއަށް ދެއްވި އިންޒާރެއް ކަމަށް ބުނެ އެޕާޓީން ކަންބޮޑުވުން ފާޅުކޮށްފައިވާއިރު، މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އަނަސް ވިދާޅުވީ، މިމަހުގެ 31 ގެ ނިޔަލަށް އެމްޑީޕީން ގިނަ ހަރަކާތްތަކެއް ކުރިއަށް ގެންދާނެ ކަމަށެވެ.
އަޅުގަނޑުމެން (31 ވަނަ ދުވަހު ބާއްވާ) ހިނގާލުމަކީ ސުލްހަވެރި ހިނގާލުމެއް. އެމްޑީޕީ އަކީ އިންތިޒާމްކޮށް ރޭވިގެން ސުލްހަވެރި ސިޔާސީ ހަރަކާތް ހިންގުމަށް ފަރިތަ ޕާޓީއެއް. މި ޕާޓީ އަކީ ގާނޫނު އަސާސީ ވުޖޫދަށް އައުމުގެ ކުރިންނާއި ފަހުންވެސް ވުޖޫދުގައި އޮތް، މިހާތަނަށް ދެމިއޮތް ހަމައެކަނި ޕާޓީ.
އަނަސް އަބްދުއްސައްތާރު
މިއާއެކު އަނަސް ވިދާޅުވީ، 31 ވަނަ ދުވަހު ބާއްވާ ހަރަކާތް ވަރުގަދަ ކުރުމަށްޓަކައި އެޕާޓީއާއި ބައިވެރިވާނެ އެހެން ފަރާތްތަކާއި ވާހަކަދެކެވި އެފަރާތްތަކަށްވެސް ދައުވަތު އަރުވާފައިވާނެ ކަމަށެވެ. އެގޮތުން، އެކި ޕާޓީ ތަކާ ވާހަކަދެކެވެމުންދާ ކަމަށް އޭނާ ވިދާޅުވިއެވެ.
އެމްޑީޕީގެ ސަރުކާރު ނިމި، ރައީސް ޑރ މުއިއްޒުގެ ސަރުކާރު ފެށުނު އެންމެ އަހަރެއްވީތަނާ އެމްޑީޕީއިން މަގުމަތީ ހަރަކާތްތަކަށް ނިކުންނަން ނިންމީ "ގާނޫނު އަސާސީގެ ދިފާއުގައި" ނިކުންނަން ވެއްޖެކަމަށް އެޕާޓީގެ ގައުމީ މަޖިލީހުން ފާސްކުރުމާއި ގުޅިގެންނެވެ. މިއީ އެޕާޓީން މިފަހުން ބާއްވާ ފުރަތަމަ މަގުމަތީ ހަރަކާތެވެ.
Advertisement
This content is created and paid for by advertisers and does not involve Voice Journalists
