ވާރޭވެހި ފެންބޮޑުވާނެކަމަށް ލަފާކުރެވޭތީ، މާލެ ސިޓީ ކައުންސިލުން ކުރިއާލައި މާލޭގެ 50 އަށްވުރެ ގިނަ ގޭގައި ވެލިބަސްތާ ޖަހައިފިއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އެކްސްގައި ކުރި ޕޯސްޓެއްގައި ބުނީ، ބޯކޮށް ވާރޭ ވެހުމުގެ ސަބަބުން މާލޭގައި ފެން ބޮޑުވާކަމަށް ފާހަގަކުރެވޭ، ނާޒުކު 56 ގެއެއްގައި ވެލިބަސްތާ ޖެހުމުގެ މަސައްކަތް މާލެ ސިޓީ ކައުންސިލުން ރޭގައި ކުރިއަށް ގެންގޮސްފައިވާކަމަށެވެ.

ވާރޭ ވެހުމާއި ގުޅިގެން މާލޭގައި ފެންބޮޑުވެ، ފެން ހިންދުމުގެ މަސައްކަތް އެމްއެންޑީއެފުން ކުރަމުން އަންނައިރު، މާލެ ސިޓީ ކައުންސިލުން ބުނީ، ބޯކޮށް ވާރޭ ވެހި ފެންބޮޑުވެދާނެކަމަށް ލަފާކޮށް ރެއިން ފެށިގެން އާންމުކޮށް ފެންވަދެ ގެއްލުވާކަމަށް ފާހަގަ ކުރެވޭ ތަންތަނުގައި ވެލި ބަސްތާ ޖެހުމުގެ މަސައްކަތް ކުރިއަށްދާކަމަށާއި، މިހާތަނަށް 800 ވެލި ބަސްްތާ މާލޭގެ އެކި ސަރަހައްދުތަކުގައި ޖެހިފައިވާކަމަށެވެ.

ހޯމަ ދުވަހުން ފެށިގެން އަނެއްކާވެސް ރާއްޖޭގެ މޫސުން ގޯސްވާނެކަމަށް މޫސުމާއި ބެހޭ އިދާރާއިން ލަފާކޮށްފައިވާއިރު، އެއިދާރާއިން ބުނީ، ރާއްޖޭގެ އިރުމަތީގައި ސަރކިއުލޭޝަންއެއް އުފެދެމުން އަންނައިރު، އޭގެ އަސަރު މިއަދުން ފެށިގެން ކުރާނެކަމަށް ބެލެވޭކަމަށެވެ. 

ހޯމަ ދުވަހުން ފެށިގެން ރާއްޖޭގެ ބޮޑު ބަޔަކަށް ބޯކޮށްވާރޭވެހޭނެކަމަށް ލަފާކޮށް މެޓް އޮފީހުން ވަނީ މި ހަފްތާގެ ހޯމަ، އަންގާރަ އަދި ބުދަ ދުވަހުވެސް މޫސުން ގޯސްވާނެކަމަށް ބުނެފައެވެ. މެޓް އޮފީހުން ބުނީ، އެދުވަސްތަކުގައި ރާއްޖެ ސަރަޙައްދުގެ ވައި ބާރުވެ، ކަނޑުތައް ގަދަވާނެކަމަށް ބެލެވޭކަމަށެވެ.

މިކަމާއި ގުޅިގެން މާލެ ސިޓީ ކައުންސިލާއި ކަމާ ބެހޭ ފަރާތްތަކުން އަންނަނީ ދިމާވެދާނެ ކާރިސާއަކަށް ތައްޔާރުވަމުންނެވެ.