ދެކުނު އޭޝިއާގެ އެންމެ ބާރުގަދަ ޕާސްޕޯޓުގެ މަގާމް މިއަހަރުވެސް ރާއްޖެއިން ހޯދައފިއެވެ.
މިއީ ވިސާއަކާއި ނުލައި އެންމެ ގިނަ ޤައުމުތަކަށް ދަތުރުކުރެވޭ ޕާސްޕޯޓުތަކުގެ މައްޗަށް އަލިއަޅުވާލައި އިނގިރޭސިވިލާތުގެ ހެންލީ އެންޑް ޕާޓްނަރސްއިން އެކުލަވާލައި ނެރޭ ލިސްޓެއް ކަމަށްވާ "ހެންލީ ޕާސްޕޯޓް އިންޑެކްސް" ގައި ދިވެހި ރާއްޖެއިން މި މަގާމު ޖެހިޖެހިގެން ދެމެހެއްޓި ތިން ވަނަ އަހަރެވެ.
މިއީ އިންޓަރނޭޝަނަލް އެއަރ ޓްރާންސްޕޯޓް އެސޯސިއޭޝަން (އައިއޭޓީއޭ) ގެ މައުލޫމާތުތަކަށް ބިނާކޮށްގެން ކޮންމެ އަހަރަކުވެސް ނެރޭ ލިސްޓެކެވެ.
ރާއްޖޭގެ ޕާސްޕޯޓްގައި ވިސާ ނެތި 94 ގައުމަކަށް މިހާރު ދަތުރު ކުރެވޭއިރު، ދުނިޔޭގެ 227 ޤައުމެއް ހިމެނޭ މި ލިސްޓުގައި މިއަހަރު ދިވެހި ރާއްޖެ އޮތީ 53 ވަނައިގައެވެ.
މި ސަރަހައްދުގެ ދެވަނައަށް އެންމެ ބާރުގަދަ ޕާސްޕޯޓަކީ ލިސްޓުގެ 83 ވަނައިގައި އޮތް އިންޑިއާއެވެ. އެގައުމުގެ ޕާސްޕޯޓުގައި ވިސާ އަކާއި ނުލައި 57 ޤައުމަކަށް ދަތުރުކުރެވެއެވެ.
މިއަހަރުގެ ލިސްޓުގެވެސް އެއްވަނައިގައި، އެންމެ ބާރުގަދަ ޕާސްޕޯޓުގެ ގޮތުގައި އޮތީ ވިސާއަކާއި ނުލައި 195 ގައުމަކަށް ދަތުރުކުރެވޭ ސިންގަޕޫރުގެ ޕާސްޕޯޓެވެ.
Advertisement
This content is created and paid for by advertisers and does not involve Voice Journalists
