ނުކުޅެދުންތެރިކަން ހުންނަ މީހުންގެ ހައްޤުތައް ހޯދައިދިނުމަށް އުފައްދާފައިވާ "ޑިސެބިލިޓީ ކައުންސިލް" ގެ ރައީސްކަމުގެ މަޤާމަށް އެދާއިރާއިން ހިދުމަތްތަކެއް ކުރަމުން އަންނަ ފާތިމަތު އިބްރާހިމް (ފާތުން) އިންތިހާބުކޮށްފި އެވެ.
މިއީ ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާ ގުޅޭ ގާނޫނުގެ ދަށުން، އުފައްދާފައިވާ ޑިސެބިލިޓީ ކައުންސިލްގެ ރައީސްކަމުގެ މަޤާމަށް ނުކުޅެދުންތެރިކަން ހުންނަ މީހަކު އިންތިހާބުކުރި ފުރަތަމަ ފަހަރެވެ. ފާތުންނަކީ މިހާރުވެސް ކައުންސިލުގައި ނުކުޅެދުންތެރިކަން ހުންނަ ފަރާތް ތަމްސީލު ކުރާ މެމްބަރެވެ. އޭނާ އެމަގާމަށް އިންތިހާބުކޮށްފައިވަނީ 2022 ވަނަ އަހަރެވެ.
މިކަމާ ގުޅިގެން ވޮއިސްއަށް މައުލޫމާތު ހިއްސާކުރަމުން، ނުކުޅެދުންތެރިކަން ހުންނަ ފަރާތްތަކުގެ ހައްގުގެ އިތުރުން، ދަރުމަވެރިއެއްގެ ގޮތުގައިވެސް އެކި ދާއިރާތަކުގައި މަސައްކަތް ކުރަމުން އަންނަ ފާތުން ވިދާޅުވީ، ނުކުޅެދުންތެރިކަން ހުންނަ މީހެއްގެ ހައިސިއްޔަތުން މިފަދަ ކައުންސިލްގެ ރައީސްކަމުގެ މަގާމަށް އާދެވުނީ ވަރަސްގިނަ ގޮންޖެހުންތަކާއެކު ކަމަށެވެ. އުއްމީދަކީ ޤާނޫނާއި ޤަވާއިދު ތަންދިން މިންވަރަކުން މަޤާމުގެ ޒިއްމާތައް ވީ އެންމެ ފުރިހަމައަށް އަދާކޮށް، ނުކުޅެދުންތެރިކަން ހުންނަ ފަރާތްތަކާމެދު މުޖުތަމައުގެ ބައެއް މީހުން ދެކެމުންއަންނަ ގޮތް ބަދަލުކުރުން ކަމަށެވެ.
ފާތުން ވިދާޅުވީ އޭނާގެ ދައުރުގައި އެންމެ އިސްކަމެއް ދެއްވާނެ އެއްކަމަކީ ޑިސެބިލިޓީ ކައުންސިލްގެ ހަރަކާތްތައް މިހާރަށްވުރެ ފުޅާކޮށް، އެތަނަކީ ރައްޔިތުން ގަބޫލުކުރާފަދަ ކައުންސިލަކަށް ހެއްދެވުން ކަމަށެވެ. ފާތުން ވިދާޅުވީ މީހެއްގެ ކިބާގައި ނުކުޅެދުންތެރިކަމެއް ހުރުމަކީ ކައުންސިލެއްގެވެސް އަދި އެހެންވެސް ތަނެއްގެ އިސް މަގާމެއް އަދާކުރުމަށް އޮތް ހުރަހެއް ނޫންކަމަށެވެ.
ދިވެހި ރެޑްކްރަސަންޓްގެ ގަވަރނިން ބޯޑުގައި މިހާރުވެސް ހަރަކާތްތެރިވަމުން އަންނަ ފާތުންނަކީ ލޮލަށް ފެނުމުގައި ނުކުޅެދުންތެރިކަމެއް ހުރިނަމަވެސް ވަރަށް ހަރަކާތްތެރި ކަނބަލެކެވެ. ފާތުން ވަނީ ބްލއިންޑް ރަނާ ހާފް މެރަތަން އަދި ދިގު ދުވުމުގެ ޤައުމީ ރެކޯޑް ގާއިމްކޮށްފައެވެ. މީގެ އިތުރުން ފާތުންނަކީ، ޕެރައޮލިންޕިއަނެކެވެ. އޭނާ ވަނީ އައިއޯޖީ މުބާރާތުން ބްރޯންޒް މެޑަލް ހޯދާފައެވެ. އަދި ފާތުންނަކީ ރާއްޖޭގައި ހަމަކަނި ލައިސަންސް އޮތް ބްލައިންޑް އޯޕަން ވޯޓާ ޑައިވަރެވެ.
އަމަލީ މައިދާނުގައި ފާތުން ހޯދާފައިވާ ކާމިޔާބީތަކަށް ބަލާއިރު، އޭނާ ވަނީ ރެހެނދި އެވޯޑާއި، ރިވެލި އެވޯޑުގެ އިތުރުން ރިވެލި ތަރި އެވޯޑް ހޯދާފައެވެ. އަދި ފާތުންނަށް ވަނީ މިދިޔަ އަހަރު ޕްރޮފެޝަނަލް އެންޑް ކެރިއާ ވިމެން އެވޯޑުވެސް ހާސިލްކޮށްފައެވެ.
ފާތުން ވަނީ ބްލައިންޑް އެސޯސިއޭޝަނާއި، ރެޑް ކްރޮސަންޓްގެ އިތުރުންވެސް ގިނަ އަދަދެއްގެ ޖަމިއްޔާތަކުގައި ހަރަކާތްތެރިވެ، އިޖުތިމާއީގޮތުން ގިނަ ހިދުމަތްތަކެއްކޮށްފައެވެ.
Advertisement
This content is created and paid for by advertisers and does not involve Voice Journalists
