އެމްޑީޕީ އަދި ޑިމޮކްރެޓްސް، މިއިން އެއްވެސް ޕާޓީއެއްގައި މިވަގުތު އަމަލީގޮތުން ހަރަކާތްތެރި ނުވާނޭކަމަށް ކުރީގެ ރައީސް ނަޝީދު ވިދާޅުވެއްޖެއެވެ.

ރައީސް ނަޝީދު ނިސްބަތްވެ ވަޑައިގަންނަވާ ޑިމޮކްރެޓްސްގެ ލީޑަރޝިޕްގެ އިސް ބައެއް ބޭފުޅުން އެމްޑީޕީއަށް ބަދަލުވެފައިވަނިކޮށް،  ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އެމްޑީޕީއަކީ އެމަނިކުފާނުގެ އަމިއްލަ ދަރިއެއްފަދަ ޕާޓީއެއްކަމަށާއި، ޑިމޮކްރެޓްސް އަކީ ޒުވާނުންނަށް ސިޔާސީ މަސައްކަތްތަކައިގެން ކުރިއަށްދިއުމަށް ލިބުނު ފުރުސަތެއް ކަމަށެވެ.

ރައީސް ނަޝީދު ވިދާޅުވީ މީގެން އެއްވެސް ޕާޓިއެއްގައި އަމަލީގޮތުން ހަރަކާތްތެރިވެގެން މިވަގުތު ސިޔާސީ މަސައްކަތްތައް ކުރުމުގެ ވިސްނުމެއް އެމަނިކުފާނުގެ ނެތްކަމަށެވެ. އެމްޑީޕީ އުފެއްދުމުގައި އެންމެ އިސް ދައުރެއް އަދާކުރެއްވި ރައީސް ނަޝީދު ވިދާޅުވީ، އެމަނިކުފާނަކީ އެއްވެސް ސިޔާސީ ޕާޓީއަކާ އިދިކޮޅުވާނޭ މީހެއް ނޫންކަމަށެވެ.

އެމްޑީޕީ އާއި ޑިމޮކްރެޓްސްގެ ނަން ގަތުމަށްފަހު ރައީސް ނަޝީދު ވިދާޅުވީ މިވަގުތު މިއިން އެއްވެސް ޕާޓީއެއްގެ ސިޔާސީ ހަރަކާތްތަކުގައި އަމަލީގޮތުން ނޫޅެވުނު ނަމަވެސް ރާއްޖޭގެ ސިޔާސީ ހަރަކާތްތަކުން މުޅިން ދުރުވުމުގެ ވިސްނުމެއް ނެތްކަމަށެވެ. ރައީސް ނަޝީދު ވިދާޅުވީ އެމަނިކުފާނުގެ ހަޔާތުގެ ގިނަ ދުވަސްތައް ހޭދަކުރެއްވީ ދިވެހިރާއްޖޭގައި ގިނަ ޕާޓީ އެކުލެވޭ ނިޒާމެއް ޤާއިމްކުރެއްވުމުގެ މަސައްކަތުގައި ކަމަށެވެ

ޤައުމުގެ ތަރައްޤީ އާއި ރައްޔިތުންގެ ތަނަވަސްކަމަށް އެންމެބޮޑަށް ބޭނުންވާ އެއް ވަސީލަތަކީ ވާދަވެރި ސިޔާސީ ހަރަކާތްކަން ފާހަގަކުރައްވަމުން ރައީސް ނަޝީދު ވިދާޅުވީ، 2008 ގެ ރިޔާސީ އިންތިހާބަށްފަހު ޤައުމަށް އާމްދަނީ ހޯދުމަށް ކުރެވުނު ކަންތައްތަކާއި ލިބުނު އާމްދަނީން ޤައުމަށް ލިބުނު އުމްރާނީ ތަރައްޤީއާއި ރައްޔިތުންނަށް ލިބުނު އިޖުތިމާއީ ރައްކާތެރިކަމުން ދޭހަކޮށްދެނީ ގިނަ ޕާޓީ އެކުލެވޭ ނިޒާމުގެ ފައިދާކަމަށެވެ.

އެމްޑީޕީ އަދި ޑިމޮކްރެޓްގެ ހަރަކާތްތަކުގައި އަމަލީގޮތުން މަސައްކަތް ކުރުމުގެ ޝައުގުވެރިކަން ނެތްކަމަށް ރައީސް ނަޝީދު ވިދާޅުވިއިރު، ޑިމޮކްރެޓްސްގެ ރައީސަކަށް ހުންނެވި ހަސަން ލަތީފާއި، އެޕާޓީގެ ނައިބުރައީސް އަކަށް ހުންނެވި ޝިފާޒް އެޕާޓީން ވަކިވެ ވަޑައިގެން، އިއްޔެ ވަނީ އެމްޑީޕީއާ ގުޅިވަޑައިގެންނެވިކަން އިއުލާނުކޮށްފައެވެ. އަދި ހުސައިން އަމްރު އާއި އަލީ އާޒިމްވެސް ވަނީ އެމްޑީޕީއާ ގުޅިވަޑައިގެންފައެވެ. މިކަމާ ގުޅޭގޮތުން އިއްޔެ ބޭއްވި ނޫސްވެރިންގެ ބައްދަލުވުމުގައި ޑިމޮކްރެޓްސްގެ މެމްބަރު އިމްތިޔާޡް ފަހުމީ ވިދާޅުވެފައިވަނީ، ރައީސް ނަޝީދު ހުންނެވީ ޑިމޮކްރެޓްސް އާއެކުކަމަށެވެ.

އެމްޑީޕީގެ ތެރޭގައި އުފެދިގެންދިޔަ ހިޔާލް ތަފާތުވުމެއްގެ ތެރެއިން ރައީސް ނަޝީދު އެޕާޓީ ދޫކޮށްލެއްވީ 2023 ވަނަ އަހަރެވެ. އޭގެ ކުރިން ރިޔާސީ ޕްރައިމަރީ އިންތިހާބުގައި ވާދަކުރައްވައި ރައީސް ނަޝީދަށް ވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.

ރައީސް ނަޝީދު މިހާރު ގިނައިން ހުންނަވަނީ ސިޔާސީ ކަންކަމާއި، ސިޔާސީ ހަރަކާތްތަކާ ދުރުގައެވެ. ރައީސް ނަޝީދު ވަނީ ސިޔާސީ ހަރަކާތްތަކުން ދުރައްޖެހިލައިގެން ހުންނެވިކަން 2023 ވަނަ އަހަރުގެ ޑިސެމްބަރުމަހުގެ ތެރޭގައި ވިދާޅުވެފައެވެ. ރައީސް ނަޝީދު މިހާރު މަސައްކަތް ކުރައްވަމުން ގެންދަވަނީ، ތިމާވެށްޓާ ބެހޭ ބައިނަލްއަގްވާމީ ޖަމިއްޔާއެއް ކަމަށްވާ ކްލައިމެޓް ވަލްނަރަބަލް ފޯރަމްގެ ސެކްރެޓަރީގެ ޖެނެރަލްގެ މަގާމުގައެވެ.