ޑިމޮކްރެޓްސްގެ ކުރީގެ ރައީސް ހަސަން ލަތީފްގެ އަމަލުތައް މިހާރު ހުންނެވީ ޑިމޮކްރެޓްސް ޕާޓީއަށް ކިލަނބުކަން އަންނާނޭ ގޮތަށްކަމަށް އެޕާޓީގެ އަންހެނުންގެ ލީޑަރު ހަމްދާ މުހައްމަދު ވިދާޅުވެއްޖެއެވެ.
ޑިމޮކްރެޓްސްގެ ރައީސަކަށް ހުންނެވި، ހަސަން ލަތީފް ވަނީ އެޕާޓީން ވަކިވެ ވަޑައިގެން އެމްޑީޕީއާ ގުޅިވަޑައިގަންނަވާފައެވެ. އެކަމާ ގުޅޭގޮތުން ރާއްޖެޓީވީގައި ވާހަކަދައްކަވަމުން ހަސަން ލަތީފް ވިދާޅުވެފައިވަނީ، ޑިމޮކްރެޓްސްގެ ތެރެއިން ސަރުކާރެއް އުފަންކުރުވައިގެން ރައްޔިތުންނަށް ހިދުމަތްކުރުމުގެ ފުރުސަތު އޮތްކަން ގަބޫލުކުރަން ދަތިކަމަށް ވިދާޅުވެފައެވެ. ހަސަން ވިދާޅުވީ ޑިމޮކްރެޓްސްއާ ހިލާފަށް، އެމްޑީޕީއަކީ ބޮޑު ޕާޓިއެއްކަމުން ރައްޔިތުންނަށް ހިދުމަތް ކުރުމަށް ކުރެވޭނެ މަސައްކަތްތައް ގިނަވާނެ ކަމަށެވެ.
ހަސަލް ލަތީފުގެ މިވާހަކަތަކާ ގުޅިގެން އެކްސްގައި ކުރެއްވި ޕޯސްޓެއްގައި ހަމްދާ ވިދާޅުވީ، އެއްމޭއްޒެއްގައި އެންމެން ތިބެ ކުރިޔަށް ދާނެ ގޮތުގެ މަޝްވަރާކޮށް، އެއްބަސްވުންތަކަށް އައި އިރު، ހަސަން ލަތީފްގެ ބަސްމަގު އިއްޔެއާ ހަމަޔަށްވެސް ހުރީ އެދެއްކެވި ވާހަކަތަކާ ދިމާ އިދިކޮޅަށް ކަމަށެވެ. ސިޔާސީ މަސައްކަތްތަކަށް ޑިމޮކްރެޓްސްގައި އޮތް ޖާގަ އެންމެ ރަނގަޅަށްވެސް އެނގިވަޑައިގަންނަވާނެ އެއް ބޭފުޅަކީ ހަސަން ލަތީފްކަން ފާހަގަކުރައްވަމުން ހަމްދާ ވިދާޅުވީ، ހަސަންގެ އަމަލުތައް މިހާރު ހުރީ ޑިމޮކްރެޓްސްގެ މަސައްކަތްތަށް ކިލަނބުވާހެން އަމިއްލަ އެޖެންޑާ ދިފާއުކުރުމަށް ކަމަށެވެ.
ޑިމޮކްރެޓްސްގެ ލީޑަރޝިޕްގެ އިސް ބައެއް ބޭފުޅުން ޕާޓީން ވަކިވުމާ ގުޅިގެން އިއްޔެ އެޕާޓީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަމްދާ ވިދާޅުވެފައިވަނީ ޑިމޮކްރެޓްސްގެ މުސްތަގްބަލް އަދި ފެށުނީކަމަށާއި، ދެން ޕާޓީގެ މަސައްކަތްތައް ދާނީ އިހަށްވުރެ ބާރަށްކަމަށެވެ.
Advertisement
This content is created and paid for by advertisers and does not involve Voice Journalists
