ކުރިއަށްމިއޮތް ދުަވސްތަކުގައި ވިއްސާރަވެ، ފެންބޮޑުވާނޭކަމަށް ލަފާކުރެވޭތީ، މާލޭގެ އެކި ސަރަހައްދުތަކުގައި 2،500އަށް ވުރެ ގިނަ ވެލިބަސްތާ ޖަހާފައިވާކަމަށް މާލެސިޓީ ކައުންސިލުން ބުނެފިއެވެ.
މެޓް އޮފީހުން ވަނީ ޖެނުއަރީމަހުގެ 18 ވަނަ ދުވަހުގެ ނިޔަލަށް ރާއްޖޭގެމޫސުން ގޯސްވާނޭކަމަށް ލަފާކޮށްފައެވެ. އެގޮތުން ރާއްޖޭގެ ބޮޑުބަޔަކަށް ގުގުރުމާއެކު ބޯކޮށް ވާރޭވެހި، ވަޔާއި ކަނޑުތައް ގަދަވާނޭކަމަށް ލަފާކޮށްފައިވާއިރު، ބައެއް އަތޮޅުތަކަށް އުދަ އެރުމުގެ ފުރުސަތު އޮތްކަމަށްވެސް އެ އިދާރާއިން ވަނީ ލަފާކޮށްފައެވެ. މެޓް އޮފީހުން ވަނީ ކުރިއަށް މިއޮތް ދުވަސްތަކުގައި މޫސުން ގޯސްވާނެތީވެ، އެކަމަށް ސަމާލުވުމަށް އިލްތިމާސްކޮށްފައެވެ.
މޫސުން ގޯސްވާނޭކަމަށް ލަފާކުރުމާ ގުޅިގެން މާލެސިޓީ ކައުންސިލުން ވަނީ މެޓް އޮފީހުގެ އިލްތިމާސަށް އިޖާބަދިނުމުގެ ގޮތުން ތައްޔާރީ ހާލަތުގައި ތިބުމުގެ މަސައްކަތް ފަށާފައެވެ. މިގޮތުން ފެންބޮޑުވާނެ ތަންތަނުގައި ވެލިބަސްތާ ޖެހުމަށް ކުރެވުނު މަސައްކަތްތަކުގެ ދަށުން މިހާތަނަށް މާލޭގެ އެކި ސަރަހައްދުތަކުގައި 2500 އަށް ވުރެ ގިނަ ވެލިބަސްތާ ޖެހިފައިވާކަމަށް ކައުންސިލުން ބުނެއެވެ.
މާލެސިޓީ ކައުންސިލުން ވެލިބަސްތާ ޖެހުމުގެ މަސައްކަތް ކުރިއަށްދާއިރު، ނެޝަނަލް ޑިޒާސްޓާ މެނޭޖްމަންޓް އޮތޯރިތީން ބުނެފައިވަނީ،
ފެންވަދެ ގެއްލުންވާ ތަންތަނުގައި ވެލި ބަސްތާ ޖެހުމަށް ވެލިބަސްތާ ބޭނުންވާ އާންމު ފަރާތްތަކަށް، ވެލި ބަސްތާ ދޫކުރުމުގެ އިންތިޒާމް މިނިސްޓްރީ އޮފް ސިޓީސް، ލޯކަލް ގަވަމަންޓް ޕަބްލިކް ވާރކްސްއިން ހަމަޖައްސަމުން އަންނަކަމަށެވެ. މިގޮތުން މިރޭގެ 10 އެއް ޖެހުމާ ހަމަޔަށް ހައުސިން މިނިސްޓްރީ ހުރި ބިމުގައި ވެލިބަސްތާ ދޫކުރުމުގެ އިންތިޒާމުތައް ހަމަޖެހިފައިވާކަމަށް އެންޑީއެމްއޭއިން ބުންޏެވެ.
މިފަހަކަށް އައިސް މާޅެއަށް ވެހުނު ވާރޭގައި މަގުތަކުގައި ފެންބޮޑުވެ ބައެއް ގޭތަކަށް ވަނީ ފެންވަދެފައެވެ. އެންޑިއެމްއޭއިން ވަނީ ބޯކޮށް ވާރޭ ވެހުމުގެ ސަބަބުން މާލޭގައި ފެން ބޮޑުވާކަމަށް ފާހަގަކުރެވޭ ، ނާޒުކު 56 ގެއެއް ފާހަގަކޮށްފައެވެ. މިގޮތުން އެ ގޭތަކުގައި ވެލިބަސްތާ ޖެހުމުގެ މަސައްކަތް މިއަދު ހެނދުނު ފަށާފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
