ތަޢުލީމާއި ފަތުރުވެރިކަން ހިމެނޭހެން ގިނަ ދާއިރާތަކަކުން ރާއްޖެއާއި އަޒަރުބައިޖާނާ ދެމެދު ގުޅުން ބަދަހިކުރަން މަޝްވަރާކޮށްފިއެވެ.
ދިވެހިރާއްޖެއާއި އަޒަރުބައިޖާނާ ދެމެދު ބޭއްވުނު ފުރަތަމަ ބައިލެޓަރަލް މަޝްވަރާ ބައްދަލުވުން އިއްޔެ މާލޭގައި ވަނީ ބާއްވާފައެވެ. މި ބައްދަލުވުމުގައި ދިވެހި ސަރުކާރުގެ ފަރާތުން ބައިވެރިވެ ވަޑައިގަތީ ޚާރިޖީ ވުޒާރާގެ ފޮރިން ސެކްރެޓަރީ ފާތިމަތު އިނާޔާއެވެ. އަދި އަޒަރުބައިޖާނުގެ ފަރާތުން ބައިވެރިވެ ވަޑައިގަތީ އެ ޤައުމުގެ ޑެޕިއުޓީ މިނިސްޓަރ އޮފް ފޮރިން އެފެއާޒް އެލްނޫރް މަމަދޮވްއެވެ.
ޚާރިޖީ ވުޒާރާގައި އިއްޔެ މެންދުރުފަހު ބޭއްވުނު މި ބައްދަލުވުމުގައި، ދެ ޤައުމުގެ މެދުގައި ކުރިން ވެފައިވާ އެއްބަސްވުންތަކާއި އެކުވެރިކަމުގެ ޕްރޮގްރާމްތަކުގެ މަސައްކަތް ކުރިއަށްދާ މިންވަރު މުރާޖަޢާ ކުރެވުނު ކަމަށް އެ ވުޒާރާއިން ބުނެއެވެ.
އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި އަޒަރުބައިޖާނުގެ ރައީސް އިލްހާމް އަލިއެވް އާ ދެމެދު ނޮވެމްބަރު މަހު ބާކޫގައި ބޭއްވުނު ކޮޕް29 ގެ ތެރޭގައި ކުރެވުނު މަޝްވަރާތަކަށް ރިޢާޔަތްކޮށް، އިންވެސްޓްމަންޓް، ތަޢުލީމު، ޘަޤާފަތް، ފަތުރުވެރިކަން، ދަތުރުފަތުރު، އަދި ދެ ޤައުމުގެ ރައްޔިތުންގެ މެދުގައި ގުޅުން ބަދަހިކުރުމުގެ ދާއިރާތަކުން އިތުރަށް އެއްބާރުލުން ދިނުމާ ބެހޭގޮތުން މަޝްވަރާކުރެވުނު ކަމަށްވެސް ބުނެފައިވެއެވެ:
މީގެ އިތުރުން، ޚާރިޖީ ވުޒާރާއިން ބުނިގޮތުގައި، މި ބައްދަލުވުމުގައި ފޮރިން ސެކްރެޓަރީ އިނާޔާ އާއި ޑެޕިއުޓީ މިނިސްޓަރ މަމަދޮވް ވަނީ ދެ ޤައުމުގެ މެދުގައި ގުޅުން އިތުރަށް ބަދަހިކުރުމަށާއި، ދެ ފަރާތަށް މުހިންމު މައްސަލަތަކުގައި ގާތުން މަސައްކަތްކުރުމަށް އެއްބަސްވެފައެވެ.
ޑެޕިއުޓީ މިނިސްޓަރ މަމަދޮވް މި ދަތުރުފުޅުގައި ވަޑައިގެންފައިވަނީ އަޒަރުބައިޖާނުގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޮމޯ) އާއި އަމިއްލަ ވިޔަފާރިތައް ތަމްސީލުކުރާ ވަފުދަކާ އެކުގައެވެ. މި ދަތުރުފުޅުގައި އެ ބޭފުޅުން ވަނީ ދިވެހި ސަރުކާރުގެ އިސް ފަރާތްތަކާ ބައްދަލުކުރައްވައި، ރާއްޖޭގައި އިންވެސްޓްކުރުމުގެ ފުރުސަތުތަކާ ބެހޭގޮތުން މަޢުލޫމާތު ހޯއްދަވާފައެވެ.
Advertisement
This content is created and paid for by advertisers and does not involve Voice Journalists
