އައު އަހަރާއެކު އިޓަލީވިލާތުން ރާއްޖެއަށް ޒިޔާރަތްކުރަމުން އަންނަ ފަތުރުވެރިންގެ އަދަދު ވަރަށްބޮޑަށް އިތުރުވެއްޖެއެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ 15 ދުވަސް ނިމިގެންދިޔައިރު ދެވަނައަށް އެންމެގިނައިން ފަތުރުވެރިން ޒިޔާރަތްކޮށްފައިވަނީ އިޓަލީވިލާތުންނެވެ. އަހަރުގެ މިހާތަނަށް އިޓަލީވިލާތުން ރާއްޖެއަށް 10,662 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު، 11.8 އިންސައްތަ އިތުރުވުމެކެވެ. ޓޫރިޒަމް މިނިސްޓްރީގެ ތަފާސްހިސާބަށް ބަލާއިރު 2024 ވަނަ އަހަރު އިޓަލީވިލާތުން ރާއްޖެއަށް 144,214 ފަތުރުވެރިން ޒިޔާރަތްކުރިއެވެ. މިއީ 2023 ވަނަ އަހަރާ އަޅާބަލާއިރު، 7 އިންސައްތައިގެ ކުރިއެރުމެކެވެ.

އިޓަލީވިލާތަކީ މީގެކުރިން ރާއްޖެއަށް އެންމެގިނައިން ފަތުރުވެރިން ޒިޔާރަތްކުރާ ޤައުމުގެ ތެރޭގައި ހިމެނުނު ޤައުމެކެވެ. ގިނަ އަހަރުތަކެއް ވަންދެން އިޓަލީވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދަށްވިނަމަވެސް މިދިޔަ އަހަރުން ފެށިގެން އިޓަލީ މާކެޓް ރަނގަޅުވަމުން އަންނަކަން ފާހަގަކޮށްލެވެއެވެ.

ޓޫރިޒަމް މިނިސްޓްރީން ވަނީ މިދިޔަ އަހަރުގެ ފަހުކޮޅު އިޓަލީވިލާތުން ރާއްޖެއަށް ފަތުރުވެރިން ގެނައުމާ ގުޅޭގޮތުން އެޤައުމުގެ ފަތުރުވެރިކަމާ ބެހޭ ވުޒާރާއާ މަޝްވަރާކޮށް ބައްދަލުވުމެއް ބާއްވާފައެވެ. މިދިޔަ އޮކްޓޯބަރުމަހު އިޓަލީވިލާތުގެ ފަތުރުވެރިކަމާބެހޭ ވަޒީރު ޑާނިއެލާ ސަންޓޭންޗްއާއެކު ބޭއްވެވި މި ބައްދަލުވުމުގައި މިނިސްޓަރު ފައިސަލް ވަނީ ރާއްޖެއަށް މިހާރު ޒިޔާރަތްކުރާ ފަތުރުވެރިންގެ އަދަދު އިތުރުކުރެވޭނެ ގޮތްތަކާ ބެހޭގޮތުން ފުޅާދާއިރާއެއްގައި މަޝްވަރާކުރައްވާފައެވެ.

ރާއްޖޭގެ ފަތުރުވެރިކަމުގެ ސިނާއަތުގައި އަބަދުވެސް އިޓަލީއަކީ ވަރަށް މުހިއްމު މާކެޓެކެވެ. ރާއްޖެއަށް 1972 ވަނަ އަހަރު ފަތުރުވެރިކަން ތައާރަފްވިއިރު، އެންމެ ފުރަތަމަ ފަތުރުވެރިއެއްގެ ގޮތުގައި ރާއްޖެއަށް ޒިޔާރަތްކުރީ އިޓަލީގެ ރައްޔިތެކެވެ.