ފެހުރިހި ބަލަންދާ އުޅަނދުތަކުގެ ބުރަފަތީގައި ގާޑު އަޅުވަން ޖެހޭ ގޮތަށް ހަދައި، ކުރިއަށް އޮތް ތިން މަސް ދުވަހުގެ ތެރޭގައި އެ އުސޫލަށް އަމަލުކުރަން ޖެހޭނެ ކަމަށް އެންވަޔަރަންމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.

ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ތާރިގް ވަނީ، ފެހުރިހި ބަލަން ދިޔަ ދެ ފަތުރުވެރިއަކު މިފަހުން މަރުވެފައިވާކަން ފާހަގަކުރައްވާފައެވެ. އަދި ފެހުރިހީގެ ގައިގައި ޖެހިގެން އެއަށްވެސް އެކި ޒަޚަމުތައް ލިބިފައި ހުރި ކަމަށެވެ

އެހެންކަމުން، ބުރަފަތީގައި ގާޑު އަޅުވައިގެން ފެހުރިހި އުޅޭ ސަރަހައްދަށް ވަންނަން ޖެހޭ ގޮތަށް ގަވާއިދު ހަދައި، ކުރިއަށް އޮތް ހަފުތާއެއްހާ ދުވަހުގެ ތެރޭގައި އާންމު ކުރާނެ އެވެ. އެ ގަވާއިދަށް ކުރިއަށް އޮތް ތިން މަހުގެ ތެރޭގައި އަމަލުކުރަން ފަށާނެ ކަމަށް ވިދާޅުވި އެވެ.

"އިރާދަކުރެއްވިއްޔާ ކުރިއަށް އޮތް ތިން މަސް ދުވަހު އުޅަނދުތައް ރަޖިސްޓްރީ ކުރެވި، އުޅަނދުގެ ތިބޭ މީހުންނަކީ ޓްރެއިން ވެފައި ތިބި ބަޔަކަށް ހެދި، ބުރަފަތީގައި ގާޑާ އެއްޗެހި އެޅުވި މި ސޭފް، ސެކިއުއާ ތަނަކަށް ހެދިގެން، ވޭލް ޝާކް ބެލޭނެ އިންތިޒާމު ހަމަޖެއްސޭނެ،" މިނިސްޓަރު ވިދާޅުވި އެވެ.

މީގެ އިތުރުން، މިނިސްޓަރު ވިދާޅުވީ، ފެހުރިހި ބަލަންދާ އުޅަނދުތައް ރަޖިސްޓްރީ ކުރަން ޖެހޭނެ ކަމަށާއި އެތަނަށް ދާ އުޅަނދުތަކުގައި ތިބޭނެ ގައިޑުންނަށް ތަމްރީނު ދޭން ޖެހޭކަމަށެވެ.

އަދި އަލަށް އާއްމު ކުރާ ގަވައުދުގެ ދަށުން ފެހުރިހި ބަލަން ކޮންމެ ގައިޑަކާ އެއްކޮށް ދެވޭނީ ފަސް ފަތުރުވެރިންނަށް ކަމަށާއި އެއަށް އަމަލު ކުރޭތޯ ބެލުމަށް އެންވަޔަރަމަންޓް މިނިސްޓްރީގެ ލޯންޗެއް އެ ސަރަހައްދު ބަލަހައްޓާ މޮނިޓާ ކުރާނެ ކަމަށް މިނިސްޓަރު ވިދާޅުވެފައިވެއެވެ.

އެ ގަވާއިދަށް އަމަލު ނުކުރާ ނަމަ ފިޔަވަޅު އަޅާނެ ކަމުގެ އިންޒާރު ވެސް މިނިސްޓަރު ދެއްވި އެވެ.