ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ނައިބު ރައީސަކަށް އެ ކޮމިޝަންގެ މެންބަރު މޫމިނާ ވަހީދަށް މަޖިލީހުން މިއަދު ރުހުން ދީފި އެވެ.
އެޗްއާރްސީއެމްގެ ނާއިބު ރައީސްގެ މަގާމަށް މޫމިނާ ވަހީދު އައްޔަން ކުރެއްވުމަށް މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ސިޓީފުޅު، އިއްވާފައިވަނީ މިމަހު 16 ވަނަ ދުވަހު ދައުރުން ބޭރުން ބޭއްވި ޖަލްސާގައެވެ.
އެ މައްސަލަ ކަމާ ގުޅޭ ކޮމިޓީން ދިރާސާ ކުރުމަށްފަހު މިއަދުގެ ދައުރުން ބޭރުން ބޭއްވި ޖަލްސާގައި ވަނީ ކޮމިޓީ ރިޕޯޓް އިއްވައި އެއަށް ބަހުސް ކުރުން ކުރިއަށް ގެންގޮސްފައެވެ.
އެއަށްފަހު ، އެޗްއާރުސީއެމްގެ ނައިބު ރައީސްގެ މަގާމަށް މޫމިނާ އައްޔަންކުރަން ރުހުން ދިނުމާމެދު ވޯޓު ނަގާފައިވާއިރު، އެކަމަށް ފެންނަ ކަމަށް 67 މެންބަރުން ވޯޓު ދެއްވިއެވެ. ނުފެންނަ ކަމަށް އެއްވެސް މެންބަރެއް ވޯޓެއް ނުދެއްވައެވެ.
މޫމިނާ އެޗްއާރސީއެމްގެ މެންބަރު ކަމުގެ މަގާމަށް އައްޔަނު ކުރެވުނީ، ކުރީގެ ރައީސް އިބްރާޙީމް މުޙައްމަދު ޞާލިޙްގެ ވެރިކަމުގައި، 2020 ވަނަ އަހަރުގެ ތެރޭގައެވެ.
މޫމިނާގެ އިތުރުން އެޗްއާރސީއެމްގެ މިވަގުތު ތިއްބެވީ؛
ރައީސް: މަރްޔަމް މުނާ
މެންބަރު: އާމިނަތު ޝިފާއަތު އަބްދުއްރައްޒާގު
މެންބަރު: ސަމާއު އަހުމަދު ނަޖީބު
މެންބަރު: އިސްމާޢީލް ހަބީބު
Advertisement
This content is created and paid for by advertisers and does not involve Voice Journalists
