ދި ޑިމޮކްރެޓްސް ގެ ހުސްވެފައިވާ ރައީސް އަދި ފިރިހެން ނައިބު ރައީސްގެ މަގާމަށް ކުރިމަތިލާން ހުޅުވާލައިފިއެވެ.

އެޕާޓީން ކުރި އިއުލާނެއްގައި ބުނީ، އެ ޕާޓީގެ ރައީސް އަދި ފިރިހެން ނައިބު ރައީސްގެ މަގާމު ހުސްވުމާއި ގުޅިގެން އެކަމާއި ގުޅޭގޮތުން ޕާޓީގެ ނޭޝަނަލް އެސެމްބްލީގެ 12 ވަނަ ބައްދަލުވުމުގައި ނިންމާފައިވާ ނިންމުމާއި އެއްގޮތަށް، އެ މަގާމުތަކަށް މެމްބަރުން އިންތިޚާބު ކުރުމަށްޓަކައި ބާއްވާ ޕާޓީގެ އެތެރޭގެ އިންތިހާބު ފެބްރުއަރީ މަހުގެ 15 ވާ ހޮނިހިރު ދުވަހު އޮންނާނެކަމަށެވެ.

މި މަގާމުތަކަށް ވާދަކުރުމަށް އެދޭ ޕާޓީގެ މެމްބަރުންނަށް އެކަމަށް ކުރިމަތިލުމަށް މިމަހުގެ 23 ވާ ބުރާސްފަތި ދުވަހުގެ މެންދުރު 12:00 ގެ ނިޔަލަށް ޑިމޮކްރެޓްސް އިން ވަނީ ހުޅުވާލާފައެވެ.

މި އިންތިހާބުގައި ވޯޓު ދިނުމުގެ ހައްގު ލިބިގެންވާ މެމްބަރުންގެ ވަގުތީ ލިސްޓް އާއްމުކޮށް، ޝަކުވާ އަށް ހުޅުވާލެވޭނީ މާދަމާކަން ފާހަގަކޮށް އެޕާޓީން ބުނީ، ޝަކުވާ ހުށަހެޅުމުގެ އެންމެ ފަހު ގަޑިއެއްކަމަށް ކަނޑައެޅިފައިވަނީ މި މަހުގެ 25 ވާ ހޮނިހިރު ދުވަހުގެ މެންދުރު 12:00 އަށް ކަމަށާއި، އެއަށްފަހު ދާއިމީ ލިސްޓް އިއުނާލުކުރަން ކަނޑައެޅިފައިވަނީ މި މަހުގެ 27 ވަނަ ދުވަހު ކަމަށެވެ.

އެހެންކަމުން، ދި ޑިމޮކްރެޓްސް އިން ވަނީ، މި އިންތިހާބުގައި ވާދަކުރުމަށް އެދޭ އެ ޕާޓީގެ މެމްބަރުން، އެކަމަށް އެދި ޕާސްޕޯޓް ސައިޒްގެ ފޮޓޯ އަކާއި ދިވެހި ރައްޔިތެއްކަން އަންގައިދޭ ކާޑުގެ ސާފު ކޮޕީއަކާއި އެކު [email protected] މެދުވެރިކޮށް ހުށަހެޅުމަށް އެދިފައެވެ.

ޑިމޮކްރެޓްސްގެ ރައީސްގެ މަގާމު ހުސްވެފައިމިވަނީ، އެމަގާމުގައި ކުރިން ހުންނެވި ހަސަން ލަތީފް މަގާމުން އިސްތިއުފާ ދެއްވުމާއި ގުޅިގެންނެވެ.

މިއާއިއެކު ހަސަން ލަތީފް އެމްޑީޕީއާއި ގުޅި ވަޑައިގެންނެވިއިރު، އެ ޕާޓީގެ އިސް ސަފުގައި ހަރަކާތްތެރިވި  އަލީ އާޒިމް އާއި މުހައްމަދު ޝިފާޒުގެ އިތުރުން، ހުސައިން އަމްރުވެސް ވަނީ، އެމްޑީޕީއާ ގުޅިވަޑައިގަންނަވާފައެވެ.