ހިންދޫ ފާދިރީއަކު ރާއްޖެ އައިސް، ރޫހާނީ ފަރުވާގެ ނަމުގައި ހިންދޫ ދީނާއި ގުޅޭ ކްލާސްތައް ނަގައި އެކަން މީސް މީޑިއާގައި އިޝްތިހާރު ކުރާ މައްސަލަ ކަމާ ބެހޭ ފަރާތްތަކަށް ހުށަހަޅާފައިވާ ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މާސްޓަރ ދުރްގާ ރައޯ ނަމުގައި ހިންގާ ފޭސްބުކް ޕޭޖެއް މެދުވެރިކޮށް ހިންދޫ ފާދިރީއަކު ރާއްޖޭގައި ކޯސް ހިންގާކަން އިއުލާން ކޮށްފައިވާއިރު، ރޫހާނީ ފަރުވާ އާއި ފާލު ބެލުން ފަދަ އިސްލާމް ދީނުގައި ޙަރާމް ކަންކަން ކުރާ ކަމަށް އޭނާ ބުނެފައިވެއެވެ.
އަދި މީގެ ދެދުވަސް ކުރިން ހުޅުމާލޭގައި އޭނާ އެކަމެއް ކުރަން ފަށާފައިވާއިރު، ސެޝަނަކަށް 300 ރުފިޔާ ނަގާ ކަމަށް މީސްމީޑިއާ ޕޯސްޓަރ ގައި ބުނެފައިވެއެވެ. އަދި ވަރަށް ގިނަ މީހުން އޭނާ ކައިރިއަށް ދާ ކަމަށްވެސް އޭގައި ބުނެފައިވެއެވެ.
މި ފާދިރީ ކަލޭގެ އެކަން ކުރާ ތަނުގައި ހިންދޫ ދީނުގެ މީހުން އަޅުކަން ކުރާ ޒާތުގެ ބޮޑު ބުދެއް ބަހައްޓާފައި ހުރި އިރު، ވަށައިގެން އަތުރާފައި ހުންނަނީ ވެސް ހުސް އެ ޒާތުގެ ތަކެއްޗެވެ.
މިކަމާއި ގުޅިގެން ”ވޮއިސް“ އިން ސުވާލު ކުރުމުން އިސްލާމިކް މިނިސްޓަރ ޑރ. ޝަހީމް ވިދާޅުވީ، އެ މައްސަލަ މިހާރު ވަނީ ކަމާބެހޭ ފަރާތްތަކާ ހިއްސާ ކުރައްވާފައި ކަމަށެވެ.
”އިސްލާމީ އަޤީދާއާއި ޚިލާފް ކަންކަމަށް ރާއްޖޭގައި ޖާގައެއް ނޯންނާނެ. އެއީ ގާނޫނާ ޚިލާފް ކަމެއް“ ވަޒީރު ވިދާޅުވިއެވެ.
މިދިޔަ އޮގަސްޓު މަހުގެ ތެރޭގައި ވެސް ފާދިރީއަކު އައިސް، ރޫހާނީ ފަރުވާގެ ކްލާސްތައް ނަގައިދޭ ކަމަށް ބުނެ ކެމްޕޭނެއް ހިންގި އެވެ. އެ އެކަމާ ގުޅިގެން އާއްމުން ނުރުހުން ވުމުން ފުލުހުންގެ ބެލުމުގެ ދަށަށް އޭނާ ގެންދިޔުމަށްފަހު ފަހުން ވަނީ ޑީޕޯޓު ކޮށްލާފަ އެވެ.
Advertisement
This content is created and paid for by advertisers and does not involve Voice Journalists
