ރ.އަތޮޅު ރަސްގެތީމުގެ ތަރައްޤީއަށް މި ސަރުކާރުން ވީ ވައުތުތައް ފުއްދުމުގެ މަސައްކަތް މިއަހަރުގެ ތެރޭގައި ފައްޓަވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރަސްގެތީމަށް ކުރެއްވި ޒިޔާރަތުގައި އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ރަސްގެތީމުގެ ތަރައްޤީއަށް ކުރަން ހުރި މަސައްކަތްތައް މިއަހަރުގެ ތެރޭގައި ފެށިގެން ބާރު ސްޕީޑްގައި ކުރިއަށްދާނޭކަމަށެވެ. ރައީސް ވިދާޅުވީ މި ސަރުކާރުން ރަސްގެތީމުގެ ތަރައްޤީއަށް ކޮށްދިނުމަށް ވައުދުވި ކަންތައްތައް މިއަހަރުގެ ތެރޭގައި ފައްޓަވާނޭކަމުގެ ޔަގީންކަން ރައްޔިތުންނަށް ދެއްވާކަމަށެވެ.

އިގްތިސާދީގޮތުން ޤައުމު އޮތް ހާލަތުން މިދިޔަ އަހަރު މަޝްރޫޢުތައް ނުފެށުނުކަން ފާހަގަކުރައްވަމުން ރައީސް ވިދާޅުވީ މަޝްރޫޢުތައް ނުފެށުނު ރަށްރަށުގެ ތެރޭގައި ރަސްގެތީމުވެސް ހިމެނޭކަމަށެވެ.

Advertisement

ރައީސް ޑރ.މުއިއްޒު ރަސްގެތީމުގެ ރައްޔިތުންނާ ބައްދަލުކުރެއްވުމުގެ ތެރެއިން..

މިއަހަރުގެ ތެރޭގައި ރަށުގެ ބަނދަރާއި، ނަރުދަމާގހެ މަސައްކަތުގެ އިތުރުން ކަރަންޓާއި ސިއްހީ ހިދުމަތްތައްވެސް ތަރައްޤީކުރުމުގެ މަސައްކަތް ފެށިގެންދާނޭކަމަށް ރައީސް ވިދާޅުވިއެވެ. މިއީ ރަށުގެ ރައްޔިތުންގެ ފަރާތުންވެސް އެދިފައިވާ މުހިއްމު ކަންކަންކަމަށް ރައީސް ފާހަގަކުރެއްވިއެވެ.

ރައީސް ޑރ.މުއިއްޒު ރަސްގެތީމުގެ ރައްޔިތުންނާ ބައްދަލުކުރެއްވުމުގެ ތެރެއިން..

ރައީސް މިއަދު ރަސްގެތީމަށް ކުރެއްވި ޒިޔާރަތުގައި ވަނީ އެރަށުގައި ގާއިމްކުރަން ނިންމި ބޭންކް އޮފް މޯލްޑިވްސްގެ އޭޓީއެމް މަސައްކަތްވެސް ކައުންސިލާ ހަވާލުކޮށްފައެވެ. މިކަމަށްޓަކައި ބީއެމްއެލް އާއި ރަސްގެތީމް ކައުންސިލާ ދެމެދު ވަނީ އެއްބަސްވުމެއްގައި ސޮއިކޮށްފައެވެ.

ރަސްގެތީމަށްފަހު ރައީސް ޑރ.މުއިއްޒު ދެން ވަޑައިގެންނެވީ އެއަތޮޅު އަނގޮޅިތީމަށެވެ. އަނގޮޅިތީމަށް ވަޑައިގެން އެރަށުގެ ރައްޔިތުންނާވެސް ރައީސް ބައްދަލުކުރައްވާނެއެވެ.