ޕީއެންސީއަށް މެމްބަރުން ވެއްދުމަށް ފޯމްފުރި މައްސަލާގައި ޑިޕާޓްމަންޓް އޮފް ނެޝަނަލް ރަޖިސްޓްރޭޝަނުގެ ވެރިންގެ މައްސަލަ ބަލަންޖެހޭނޭކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ، އައިޑީކާޑް ޔުނިޓްތެރޭގައި ޕީއެންސީއަށް ފޯމްފުރިކަން އެ ޔުނިޓްގެ ވެރިން އެއްބަސްވެފައިވާކަމަށާއި، ޑީއެންއާރުގެ ވެރިން މި ކުށަށް އިއުތިރާފުވެފައިވާތީ މައްސަލަ ބަލައި އިދާރާތަކުން ފިޔަވަޅު އަޅަން ޖެހޭ ކަމަށެވެ. ފައްޔާޒް ވިދާޅުވީ، ޑީއެންއާރުގެ ވެރިން އެއްބަސްވެފައިވާގޮތުން ޕީއެންސީއަށް ވަގު ފޯމު ފުރީ ރައްޔިތުންގެ ޒާތީ މައުލޫމާތު ރައްކާކުރެވިފައިވާ ދައުލަތުގެ މުއައްސަސާއެއްގެ ތެރޭގައި، ދައުލަތުގެ މުދާ ބޭނުންކޮށްގެން، އެ ތަނުގެ މުވައްޒަފުންކަމަށެވެ. 

އެހެންކަމުން މި މައްސަލާގައި ޑީއެންއާރުގެ ވެރިންގެ މައްޗަށް ފިޔަވަޅު އެޅުމުގެ އިތުރުން، ސަރުކާރު ހިންގާ ޕީއެންސީއިން އިލެކްޝަން ކޮމިޝަނުން މިދިޔަ މުއްދަތުގައި ހުށަހެޅި ފޯމުތައް ބާތިލުކުރަން ޖެހޭކަމަށް ފައްޔާޒް ވިދާޅުވިއެވެ.

Advertisement

އައިޑީކާޑް ޔުުނިޓް ތެރޭގައި ޕީއެންސީއަށް މެމްބަރުން ވެއްދުމަށް ފޯމްތަކެއް ފުރާ މަންޒަރު ފެންނަ ފޮޓޯތަކެއް ފެންމަތިވެފައިވާއިރު، ޑީއެންއާރުގެ މީޓިން ރޫމް ތެރޭގައި އެފަދަކަމެއް ހިނގިކަމަށް ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހީމް ވިދާޅުވެފައިވާކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ. 

ޕީއެންސީއަށް އޮޅުވާލައިގެން ފޯމްތަކެއް ހުށަހެޅި މައްސަލާގައި އިދިކޮޅު އެމްޑީޕީން ވަނީ ހޯމް މިނިސްޓަރު އަލީ އިހްސާން މަޤާމުން ވަކިކުރުމުގެ މަސައްކަތް ފަށާފައެވެ. މީގެ އިތުރުން އެ މައްސަލަ ސަރުކާރުގެ ކަމާބެހޭ އިދާރާތަކަށްވެސް ވަނީ ހުށަހަޅާފައެވެ. މި މައްސަލާގައި ހޯމް މިނިސްޓަރު އަދި މިހާތަނަށް ވަކިއެއްޗެކޭ ބުނެފައެއް ނުވެއެވެ.